今早韓君婷回覆本報記者，回應破產加蔡國威「迫遷」雙重打擊現況，她無奈說：「冇辦法，呢條路都要照樣行嘅，我ok嘅！」

提到傳她破產後即被蔡國威「迫遷」，兩人友情一刀兩斷，她鐵證有此事：「其實呢兩年嚟，佢一路以我名聲，不停約啲記者去做訪問，喺TVB度搲撈，所以佢會出千字文、萬字文，我一啲都唔出奇，呢啲可以睇到佢係乜嘢嘅人。我破產之後，佢當晚問我幾時搬走？而嗰個星期我搵樓期間好唔開心，好難受！每日要睇嘅面色，真係好難受，所以我冇心情，只係客客氣氣去包容佢...真係睇清楚呢個人囉！」她重申「我係喺佢屋企住咗兩年，但我冇白食白住，所有嘢做足㗎！呢兩年嚟記者偷拍、做新聞，全部由佢操控...呢兩年佢都幾好呀！有幾多新聞呀！其實由佢當初話我食佢、住佢、靠佢，佢又突然間改口風，話我有畀錢！」

對於蔡國威用四點駁斥她指控，「鬼妹」不再回應，她沒好氣說：「我唔想逐點、逐點、逐點嚟回應佢啦！因為呢個人只會逐點、逐點、逐點大話落去，我唔想再講呢個人，唔想再畀機會佢最想得到嘅效果，我唔可以包容佢再傷害我！」