薛家燕將月底榮升嫲嫲，BB未出世已經腳頭好好，帶挈嫲嫲與爸爸石耀庭（Jackson）接了果汁廣告，由爸爸執導，嫲嫲做女主角！Jackson請來6呎嫩口型男做男主角，家燕姐開心不已，笑說：「個partner叫Daniel，有型又識做戲，因為廣告要表情十足，佢又做得幾好，睇番play back發覺我哋幾襯，我直情成個青春晒。」
問到有否掂手仔？家燕姐笑指︰「手仔？有冇掂到呀？眼神呢……哎呀，眼神呢……流口水添，眼神好多接觸，手仔就應該冇掂到。（你隔咗幾耐冇掂過男仔手仔呢？）唔係好耐啫，我成日同人握手嘅，哈哈！咁拖吓手仔都係禮貌嚟，你知我隨和，又充滿偉大嘅愛，如果真正拖手仔呢排就冇喇，可惜因為疫情關係，大家要天各一方，惟有靠手機同電腦傾偈，希望可以快啲拖到手仔啦！」
再次母子檔合作，家燕姐有感Jackson要求一次比一次高︰「上次要我做Captain Nancy打成十幾廿次，今次佢嫌我飲果汁飲得唔靚，話要做啲誘人動作，我都唔知點解要誘人，所以要問吓監製即係Justina（珊珊），佢兩個度好晒，有晒storyboard，話係客戶要求喎。」