余德丞、丁子朗、黃庭鋒、孔德賢、劉頌鵬及李爾晨近日為節目《Mean Talk》擔任嘉賓，在主持人江美儀及林盛斌（Bob）的「逼供」下，「半推半就」爆出不為人知的娛圈新人辛酸史。早前因踢波昏迷入ICU的余德丞，慨歎事發後一直被標籤，因而錯失大量工作機會，包括與蔡思貝再合作拍旅遊節目，「大家都對我抱懷疑態度，我真係已經好番晒，有醫生證明我適合旅遊同工作，但就算你講一百次、一萬次都係冇用。好唔公平！」他又指曾被叫「收X」及要四處跪求才能再獲取工作機會。

黃庭鋒則指曾遭黑心前輩連環「蹧質」，「有一場臨時加咗個Tag，我係咁甩嘴，啲crew就開始𤷪，猛問：『你仲要嚟多幾多次？』嗰吓我就慌喇！就以眼神向前輩求助，點知我再NG多一個shot後，突然有把聲話：『𠵱家啲新人唔記稿㗎！冇做功課㗎喇！』我嗰吓好想爆粗！我冇諗過佢幫我，但亦冇諗過佢嚟多腳。」Bob即追問事後有否跟前輩「重提舊事」，庭鋒再意有所指謂：「唔止一件事㗎！」至於丁子朗則自爆曾約會TVB女神級藝人，可惜最後卻因殺出正印男友而被迫放棄，子朗仲話女神好樂意幫助新人𠻹！