疫情下，市民都驚接觸到病毒而中招，出入商場拉門、推門都步步為營，有人出動手巾、有人戴手套防疫，以免碰到任何外來物。有網民日前在討論區以「而家啲人係咪咁驚開門」為題發文，分享在商場遇上「自私精」等人開門的親身經歷。

該網民指，商場大門多數是透明玻璃，一天，當他正離開商場時，見一名中年女人手持紙巾迎面而來，雖然她較樓主快抵達大門，但奇怪是，她無直接推門入內，而是等樓主先開門，樓主不憤，與女人對望2秒後，決定自行拉開門「攝個身出去」，然後再很有手尾地將門關上，換來對方「摺」一聲，最後該女士唯有「死死地氣」自行開門。

此經歷引起不少網民共鳴，批評「咁驚唔好出街啦! 」亦有人指開門完全是攻防戰，有網民更指，見過有人一步出升降機就專登行慢些「等人開門」，出了門口後卻突然「勁趕時間」行得極快，行為自私。