羅敏莊(Mimi)早前宣佈將於九月四、五日在九展匯星Star Hall舉行演唱會，連日來她除了為演唱會進行籌備工作外，亦頻頻進行宣傳活動，日前為TVB娛樂新聞台節目《StarTalk》接受主播許文軒(Edmond)專訪，大談相隔九年再舉行大型售票演唱會感受。Mimi對於開實體騷大表興奮，她說：「疫情關係停咗好多騷，冇晒表演，完全見唔到觀眾，好感恩有機會可以實體見到觀眾。其實自己一唱Live Band，聽到琴聲、鼓聲、結他聲就會興奮，我覺得唱歌係留喺我入面嘅血，可以拎起支咪唱歌就會開心，而且自己都餓咗好耐，好想快啲親身感受下觀眾嘅掌聲、歡呼聲。」