韓國女星李施昤與企業家老公趙承賢結婚4年依然好Sweet，不時在社交網一同拍搞笑短片。李施昤今日上載新片，全程由老公揸機，原來她正在洗手間敷Mask及脫腳毛！面對老公突襲，李施昤反應相當驚慌，「我敷緊Mask呀！你做咩呀！」但趙承賢一於繼續拍片，更晒出李施昤出席活動時的靚相，問：「同一個人嚟㗎？」兼大笑。趙承賢「花式自殺」激得李施昤大叫「黐線咩你？走呀！」，用毛巾擋住面，一邊閂門趕走老公一邊爆粗，相當好笑。