每年暑假都會有大批畢業生投身職場，fb專頁「奴工處」周三（9月29日）刊登一名網民投稿，事主指自己是一名應屆畢業生，早前上司要他負責一個項目，而他最後用自己的方法完成目標，但竟被一個資深同事在限期前兩小時才指他做錯事，「佢話教過我點做，重帶咗我去老細度同老細講我做咗啲咩，講到好似我做錯嘢咁，跟住走嚟監督我收科。」

事主坦言，自己使用的方法可能不是最好，亦可能不是老細心中的「expected behaviour」，但不明白為何會被人責罵，「嗰刻我真係好想講『我無做錯』，不過我太廢忍唔住自己啲眼淚。你話我做得唔好我可以改，但係係咪你講過嘅方法我就一定要跟，係咪你就可以嚟話屈我話我錯再攞我去邀功，係咪就一定要被你屈我話因為我無做好STUDY所以先搞成咁？」

事主又認為自己上班是來學習，而非做布偶公仔，按照上司所有的指示而工作，「咁無思想無空間做咩唔你自己做，你連一個話我做嘅點解唔好嘅理由都無」。最後，事主希望向上司表示自己沒有做錯事，並了解自己的做法為何不好，又求問網友自己是否太計較。

「奴工處」的小編亦有就帖文留言，認為事主可向上司了解事件，「有時可能對方嘅方法較適合公司其他人follow up，又可能有其他原因…建議最穩陣係先跟人哋嘅方法，做耐咗明白多啲先去試改良個方法。」

帖文引來多名網民熱議，不少人認為樓主應該返新工，應該聆聽舊人的意見，之後掌握工作技巧後，再作出改善，但亦有人認為樓主只是投入工作，才會這麼執著，「返新工都應該聽咗人哋講嘢先。一嚟就大刀闊斧，得罪晒啲人」、「老闆鐘意啲乜你咪投其所好囉，佢話咁整就咁整，當然有佢原因，亂咁改人哋啲嘢，到時出大鑊嘢瀨晒落你度都得啊！」「其實新仔最好就跟返舊人嘅 instructions 先，到上咗手先 develop 自己嘅一套會較理想。」

帖文轉載自「奴工處」