唐韋琪(Vikki姐姐) 徒弟張若希(Cheyenne)上月30日18歲生日，經理人Vikki姐姐與公司同事、張媽媽為若希舉行生日會，踏正凌晨12時，大家唱生日歌及切蛋糕之外，Vikki姐姐更特別為若希準備咗一瓶咖啡甜酒進行18歲成人禮，讓她飲成人後第一杯酒！Vikki姐姐第一次鼓勵她飲酒：「18歲成人啦！可以嘗試飲啲酒，第一次飲酒，所以揀咖啡甜酒，比較易入口。」若希飲到醉醉地不時大笑又大叫：「我唔想變大人呀！唔要做大人呀！我要做細路！」

踏進成人階段，若希表示一定要多謝媽媽，並搞笑說：「我覺得自己好叻，可以生存咗18年，時間過得好快，冇諗過喺咁複雜嘅世界可以生存到18年，我要多謝媽咪，我仲記得細個時，媽咪餵我食飯；幼稚園湊我返學，之後就讀中學，辛苦媽咪及爸爸將我養大。」

生日願望戒掉太執著
她表示生日願望好簡單：「希望自己唔好再咁低能，我已經18歲，但好多人都話我似10歲。仲有，我想同自己講，想改掉所有壞習慣，我好執著，成日好似聽唔到人家講嘢咁，總之奇奇怪怪！」Vikki姐姐則祝福愛徒人生更精彩，繼續堅持她的唱歌夢想及大學成績優秀。