「靚聲王」張偉文(Donald) 行動不便，近年較少周圍去，出入範圍喺老人院附近。不過，昨天入電視城錄影今晚播出嘅TVB節目《善心滿載仁愛堂》時竟遇上狂風及暴雨，雖然好友方俊(Aman)仍冒住風雨車出車入，照顧周到，但風雨問題搞到交通大擠塞，錄影節目出現延誤。節目中張偉文只演繹一曲《每當變幻時》，卻由原定一粒鐘搞足大半日，真係波折重重，即使Donald有啲攰，不過做善事冇計，亦為年底舉行嘅演唱會做吓熱身。


不過最近Donald有啲黑仔，據好友兼監護人方俊透露，張偉文前日發現唔見咗個隨身袋，袋中有銀包，現金、身份證、回鄉卡及信用卡等，但Donald又唔知幾時及喺邊度遺失，好彩現金只得幾百蚊，稍後要陪他去補領。

 
張偉文在4年前受腰椎病影響，前後接受過兩次腰椎大手術，術後頸椎退化令雙腳冇力，多次跌倒撞親搞到腦積血，2019年要入院放血續命！之後記性漸差，由於行動不便近年要入住老人院護理，政府嘅社福津貼唔夠支持生活，要靠方俊每月嚟補貼，而最近Donald翻肥到200磅，狀態大勇，將會喺今年12月20日、明年1月12日及14日分別喺香港文化中心、沙田大會堂及元朗劇院舉行《友情有義演唱會》，從而搵啲錢傍吓身。