學歷與人品不一定成正比。有任職公司人事部的網民於社交網投稿，指近日遇到一名野蠻無禮的大學畢業生，該畢業生錯誤申請了兼職工作卻不肯承認，更惡人先告狀用粗口怒罵樓主「睇錯」，又自稱認識該公司的高層，着樓主小心。該畢業生的母親得悉事件後，竟致電代「小朋友」道歉，令樓主甚感無奈。

該名網民於Facebook專頁「生仔要考牌系列」投稿，指自己從事人力資源管理的工作，近日致電予一名應屆畢業大學生約定面試詳情，對方的求職信列明申請一個兼職職位，惟對方聽到為兼職工作後，竟用粗言穢語怒罵樓主，「其實你自己打開對眼，睇真啲啦。我呢，今年大學畢業嘅，你覺得我有冇可能，有full time（全職）唔申請，要申請 part time（兼職）呀？你自己睇清楚啦！做HR做到你咁嘅都係第一次見」，更揚言其家人認識該公司的高層，斥樓主有眼不識泰山。

因該名畢業生否認自己申請兼職職位，樓主於是即時翻查記錄，「100%肯定佢係報咗份part time（兼職）」，他亦無奈表示「如果佢真係識我哋高層，不如直接畀份履歷高層啦，根本唔使咁辛苦自己寄求職信」。沒料數小時後，該名畢業生的母親竟親自致電向樓主道歉並求情，「唔好意思，頭先我個小朋友可能有少少誤會，可唔可以再畀機會佢面試？」。

樓主在文中不禁嘆息在求職階段，一些家長仍不斷出面幫忙，以為幫到子女到公司見工，再幫他們取得或拒絕工作機會，甚至投訴上司或同事，但其實這種「幫忙」反而害了子女，更形容該班家長是直升機家長，在子女頭上盤旋，怪獸家長養成怪獸子女。

帖文引起網民熱論，網民紛紛斥該名畢業生自以為是，「既然你（大學生）咁勁，唔好打工啦，唔去做老闆？」、「其實真係好多大學生未見過世面，以為自己讀緊書，就可以不可一世嘅態度」；亦有網民批評沒家教屬父母之過，「養佢一世啦，出社會幾麻煩大家」、「一個大學生畀自己阿媽形容係小朋友，其實都係一種侮辱」。

資料來源：生仔要考牌系列