張繼聰與謝安琪的四歲女兒張靖相當搞笑，難得一對父母又不吝嗇，經常將囡囡的搞笑片段與大家分享，日前張靖的IG貼出一條片，原來她看見哥哥張瞻飲嘢，於是苦苦哀求哥哥給她飲，哥哥表示等一等給點耐性。於是，張靖首先使出冧功，雙手摸著頭再點頭講唔該，然後又做出飛吻動作。

不過，哥哥唔受𠱁，依然表示要有耐性等一等。張靖隨即開始喊，喊喊吓突然峰迴路轉，雙手開始拍掌打拍子，把口則唱出：「Baby shark, doo, doo⋯⋯」令旁邊一眾成年人邊笑邊說：「點解唔開心要唱Baby Shark ？」話口未完，張靖唱唱下Baby Shark又真係收聲唔再喊，好有趣。