TVB綜藝節目《男神廚房》明晚（15日）播出的第七集，將展開新一輪男神對決，請來元祖級《美女廚房》主持「率直男神」方力申、世界口琴冠軍「好吹得男神」李俊樂、「廢青男神」周嘉洛及「無難事男神」關禮傑應戰，美女試食團成員則為林夏薇、馮盈盈及美女廚師Hilda。

是集菜式主題為「辣」，「處男廚神」嫌疑人物則有兩大目標，分別為小方及周嘉洛。先說小方，雖然看似準備十足、食材齊全，但烹調功架卻水準之下，除了被發現挑蝦腸挑至隻蝦「面目全非」外，就連切辣椒手法都勁騎呢。「屋漏兼逢連夜雨」的小方，烹調途中更發現身處的廚房冇水，即時大叫救命，可惜未獲同情，更遭鄭裕玲（Do姐）下狠話謂：「呢個係懲罰你呀！你以前蝦咁多美女吖喇！」小方聞言即識做地表示自己是來「消孽障」，隨即再向隔籬的周嘉洛「撲水」，可惜因有段距離，搞到小方「兩頭唔到岸」。小方在Fine Dining環節，除了被狠彈作品「鹹辣腥」外，更會遭牙尖嘴利的盈盈質問多年來水洗唔清的「假奶」事件，相當有娛樂性。