胡鴻鈞和羅天宇在《十月初五的月光》中有hehe情，羅天宇透露與胡鴻均第一日開工已經有較多身體接觸，他說：「由腳到背部都好緊貼，我份人較內向，未遇過一個男人係咁，有啲唔習慣；但冇陰影嘅，佢喺現場搞到氣氛好好，對拍攝有幫助。」胡鴻鈞笑言鍾意將內向的人變火熱，以前讀書也喜歡搞事搗亂，今次與天宇合作經常撩玩及傾偈，指對方好幽默。

有網民批評何依婷聲線吵耳好嘈，胡鴻鈞不覺依婷好嘈，指她的角色有少少「巴渣」只是配合情節，未埋位拍攝時，她很少說話，會勤力睇劇本培養感情，希望觀眾繼續追看。說到劇集播出後多負評，天宇稱早段劇情要交代大家關係及背景，之後情節會好睇。胡鴻鈞則說以觀眾角度去看，首五集未到戲肉，大家要少少耐性繼續收看。觀眾將他與張智霖作比較，胡鴻鈞說是預期中會發生，他說：「自己冇壓力，拍劇前已經知道同張智霖冇得比較，對方演初哥哥係永遠嘅經典，我重拍呢部劇，只係希望將21年前嘅角色，重新介紹畀年輕觀眾。」