1月10日，多雲，早上清涼，下午短暫時間有陽光。美股上周五偏軟，三大指數下跌，總結一周，道指、標指、納指分別累跌0.29%、1.87%、4.53%。至於港股喺夜期則靠穩，跟ADR均重上23500水平。美國上周公布就業數據，上月非農就業職位增加19.9萬個，遠遜市場預期的44.7萬個。同月失業率回落續0.3個百分點，至3.9%，勝預期。強勁嘅就業數據，令市場傾向相信加息步伐將較預期快，美國10年期國債孳息率上周曾升穿1.8厘，令高估值股份繼續受壓。

今個星期則有多項重要數據公布，而星期三中國及美國雙雙公布通脹數據，或預示兩國貨幣政策可能各走各路。美國去年11月通脹幅度創逾30年以來新高的同時，中國通脹僅屬溫和，情勢大相逕庭，預示兩國貨幣政策勢將背道而馳，美國正啟動加息周期，中國則有機會需要進一步減息或放寬幣策，以刺激經濟和通脹。雖然聯儲局態度轉鷹，但美股美現仍不俗，根據過往歷史表現睇，美股喺首次加息前數月通常表現良好。而美股將步入業績期，只要企業交出見得人嘅成績表，美股或得到支持。

至於港股繼續被動，周三中美通脹數據左右兩國貨幣政策，為港股增添變數，預期港股即使可進一步反彈，但恒指喺24000水平阻力唔細。雖然息口趨升帶動金融股做好，但變種病毒令本港爆發第五波疫情，將影響本地地產股表現。而內房股債務問題不絕，加上新能源板塊上周開始殺估值，未知呢個情況會否延續至本周，港股本周睇怕難寄予厚望。

本周港股表現最主要受制中美兩國嘅通脹數據，要留意內地生產者價格指數(PPI)上漲問題會否傳導至消費者價格指數(CPI)。恒生指數本周升到23800至24000點就會阻到唔少壓力，屆時市場就可能會借勢回調，初步支持位為23000點、即10日移動平均線下方。

古天后

(徐狄怡，證監會持牌人)