2月7日，多雲，早上寒冷，下午漸轉天晴，風勢清勁。美股業績期，企業盈利表現各異，股價走勢亦各走極端。隔晚美股下跌，三大指數下跌，道指跌514點；標指跌111點；納指跌幅更超過3%，創自2020年9月以來最大單日跌幅。Facebook母公司Meta股價暴瀉26.39%，市值蒸發逾2300億美元，創美國市場歷史上最大單日市值跌幅。Meta第四季度業績表現遜預期，Facebook用戶增長停滯，預計2022年首季業績按年增速將受到美國通脹等不利影響。不過社交媒體Snap公布，於上季度，收入按年增42%至13億美元，淨利潤錄2,255萬美元，為該公司史上首次錄得利潤，股價於盤後狂升近六成。有分析指喺科技股走弱，大宗商品價格上升及信貸息差擴闊影響下，美股或再跌逾一成，當中連登契媽旗下嘅基金ARK更被睇死，未來要跌足18個月。

美股表現仍反覆，高估值科技股係近日跌市元凶，喺收水預期下，呢一類股份被資金捨棄，而美股普遍估值唔平，舊年表現冠絕全球嘅美股，今年可能落後於人。相反中港股市呢邊，舊年表現大落後，但喺全球其他央行收水之際，內地穩經濟，保增長情況下，反其行而道有機會放水，維持較寛鬆嘅貨幣政策，反而喺今年有機會跑出。尤其去年指數重磅嘅科技股，一直受監管風暴影響，殺估值殺足一年，今年有機會嚟個估值重評大翻身，連帶推動港股一步步做好。

今日係虎年首個交易日，不過北水要待下周一回歸，估計今日大市都唔會有太大驚喜，但喺假期前，港股已唔多受美股波動所影響，雖然隔晚美股急挫，但今日港股仍有機會紅盤高開，能夠重返24000水平企穩，後市仍可睇高一線。祝各位缸邊友虎年旗開得勝，虎年大旺，虎進金來。

　　古天后

　　(徐狄怡，證監會持牌人)