2月8日，多雲，日間部份時間有陽光，繼續陰陰涼涼。市場觀望個別企業派成績表，美股經歷上星期大起大落後，踏入本周市況回穩，三大指數隔晚個別發展，道指幾乎持平升1點，標指跟納指分別跌16點及82點。唔同大行對美股後市睇法有異，細摩認為全球股市已反映各央行準備收水，而企業盈利跟現金流表現理想，勞工市場強功，通脹亦快將到頂等利好因素，若然誤判經濟將邁向衰退係錯誤嘅，美股應該仲有得升，上升周期尚未結束。不過大摩就唱反調，指美股開始步入寒冬，更點名多隻疫情受惠股，包括Netflix、PayPal和Meta等，之前被過度消費，估值重評下股價將回調。

至於港股上周假後復市急升800點，紅盤高開高收，雖然噚日指數略為回吐，但走勢尚算硬淨，守住多條移動平均線，而24000支持不俗，短線阻力為25000至25300。至於內地噚日後市則紅盤高收，文化和旅遊部測算春節七天假期，全國國內旅遊出遊達2.51億人次。雖受新疫情影響，惟數據顯示復甦力度不弱。加上冬奧熱潮帶動，吉祥物冰墩墩火速售罄。新春和冬奧效應和國家政策鼓勵下，估計2月消費數據有憧憬。奇怪係噚日內需股跟消費股多精神，即管睇睇整固後，呢個板塊有冇機會回勇。

其實喺全球大部份央行部署收水之際，內地則求穩經濟，反其行繼續實施較寬鬆貨幣政策，相信今年內地股市可以一洗過去幾年頽風，從近日資金流向可反映一二。根據大行高盛資金流統計數據，截至2月2日，流入內地股市資金高達142億美元，佔O左新興市場一半以上份額，而且係眾多國家或經濟地區流入最多嘅一個地方。相反，資金明顯由債券市場流出，有高達290億美元。數據說明喺環球加息下，資金雖有流走，但只係從債券市場流出，加息並未影響資金對股市嘅喜好，起碼1月內資金仍是偏好股市，尤其係內地市場。

古天后

(徐狄怡，證監會持牌人)