馮允謙(Jay)新歌《報復式浪漫》邀請人氣女神劉沛蘅(Hillary)擔任女主角,要飾演熱戀中情侶,攞正牌瘋狂放閃!MV其中一幕,二人要在床上談情,Jay擔心被人覺得好咸濕,一度唔知將手放去邊,他說:「唔敢亂擺又怕摸錯地方,於是就放喺佢個頭上。」Hillary哈哈大笑說:「你係咁摷亂我個頭,每次Cut機都要執一次。」Hillary在MV裏飾演一名控制狂女友,不但鎖住Jay在屋企,還迫他穿情侶裝、手機殼、Wallpaper,甚至躲在床下底監視男友,非常誇張。
導演要求甚高,要Jay以不同層次向Hillary講「I Love You」,百厭的Hillary不停搖頭裝聾,要他講完又講。最初細細聲溫柔地在她耳邊講,然後愈講愈激動,最後做埋動作,大大小小的心形手勢都做齊,Hillary仍然甜笑不停搖頭,Jay拿她沒辦法,拳頭硬晒,還肉緊地捉住她手臂,全場爆笑。足足講了百次「I Love You」,二人笑言打破人生中,示愛和被示愛的紀錄。他們說:「無論有沒有情人,只要好想有Sweet嘅感覺,就可以日日重復睇呢個MV,睇我哋好變態咁互相用浪漫報復對方!」
![Hillary在MV裏飾演控制狂女友。](https://image.hkhl.hk/f/1024p0/0x0/100/none/1b5be680bdd888025d6731748750960b/2022-02/DSC03253.jpg)
![馮允謙推出新歌《報復式浪漫》。](https://image.hkhl.hk/f/1024p0/0x0/100/none/1f82e1f259e6f3ab6fdfdc8568b66c4f/2022-02/DSC03287.jpg)
![Jay叫大家睇佢哋點樣好變態咁互相用浪漫報復對方!](https://image.hkhl.hk/f/1024p0/0x0/100/none/30b755dadd2fb59a8ef2d84fde0ccb70/2022-02/DSC03395.jpg)
![Jay讚Hillary個樣夠Sweet,好啱呢首歌。](https://image.hkhl.hk/f/1024p0/0x0/100/none/1effc98dadaa9d616481d0d99e879050/2022-02/DSC03714.jpg)
問Jay為何邀請Hillary做MV女主角?他表示不用多說時,在旁的Hillary撒嬌:「講啦,講啦,我想聽呀!」他笑說:「我哋一早喺IG相識,第一次傳短訊畀佢時串錯佢英文名,好瘀,所以搵佢拍MV賠罪。」Hillary失望扁嘴。Jay認真地說:「睇佢個樣咁Sweet,就知好啱呢首歌啦!其實我一直都好想同Hillary合作,後來知道原來我哋係同公司,所以就大膽要求請佢拍MV。」Hillary聞言心花怒放,說:「真係你要求搵我?好開心。我好鍾意你嘅歌,公司話我知同你拍MV,我勁開心!」還即時講出多首他的作品名,證明自己是鐵粉。而當Jay一人埋位時,Hillary就如小粉絲般用手機拍攝。
![奉旨談情。](https://image.hkhl.hk/f/1024p0/0x0/100/none/4db83db47b624a26ca96cb0d7128cd8c/2022-02/DSC04667.jpg)
![講足100次「I love you」。](https://image.hkhl.hk/f/1024p0/0x0/100/none/fc25af8c3d1243ddfe4743e169a4748f/2022-02/DSC04749.jpg)
![望落都幾襯。](https://image.hkhl.hk/f/1024p0/0x0/100/none/17f0946190cb0b66926b9e65296a0e8f/2022-02/IMG_1723.jpg)
![Hillary自爆係Jay嘅鐵粉。](https://image.hkhl.hk/f/1024p0/0x0/100/none/73788f840078b6245b201afacff7ea9b/2022-02/IMG_1724.jpg)
更多第5波疫情資訊,請到以下專頁瀏覽(按此)
立即下載|全新《星島頭條》APP:https://bit.ly/3yLrgYZ