梁靖琪（Toby）在TVB劇《家族榮耀》，飾演馬家二奶女「Chelsea」 ，角色默默為家庭付出，她坦言同自己顧家性格好似。提到劇中跟陳少邦有段性愛片，Toby直言電視尺度有限，不過坦承已為人妻後，親熱或性感戲會尊重老公施雋賢（Jonathan）意見才接拍。而正懷第二胎B仔的她，已決定封肚唔再追B女。採訪：杜淑霞 攝影：葉君海 髮型：Michael lam@Beijing hair culture化妝：Stephen Lau@StephenMakeup
Toby覺得同「Chelsea」最似就是顧家性格，「佢做任何嘢都係為屋企，幾似我本人，因為我成日好想爭取我阿爸（梁家樹）嘅認同。」而最困難地方是角色是律師，「記啲律師對白原來咁辛苦，難度好高，因為我係全公司嘅律師，有時要解釋返畀啲阿哥聽嗰啲條文。」她承認生B後記性更差，「記咗3日先記得幾行字，真係有壓力，不過我老公話我呢一胎記性仲差。」
第二胎陀得辛苦
劇中Toby跟陳少邦有段情，仲講述有兩人性愛片段流出，難免會有親熱戲，她事前都有問准老公，「電視尺度唔會去到好犀利，個個睇完係會『唓！』。不過就算我同阿邦有啲牀上戲，都有同老公講有場咁嘅戲你點睇，老公會問返我『你覺得呢』，佢好好會畀好多選擇權我，好支持我，但我都有追問佢，『你可唔可以畀個答案我』，佢唔會話最好唔好，但我一定尊重佢，最緊要佢舒服。」
講到懷第二胎B仔，預產期是4月，Toby覺得比起陀大仔施睿文（Roman）時辛苦得多，「呢胎頭嗰幾個月嘔到好辛苦，第一胎舒服到爆，好似只係覺得慢慢肥咗，但呢胎真係比較辛苦，可能我又湊緊大仔。第一胎日日食雞蛋牛油果，好似預備儲肥自己，但呢胎開頭嘔唔係食得好多嘢，所以頭一胎肥咗40幾磅，好大嚿，呢胎得一半。」她坦言跟家人都恨生女，但不會再追，「我屋企人好期待有個女仔，因為我家姐生3個仔，我又兩個，想有個女嗲吓，但兩個夠啦！好大負擔，香港讀書又好辛苦，同埋家姐第3個都係仔，我冇信心追到個女。」
更多第5波疫情資訊，請到以下專頁瀏覽按此 https://bit.ly/3JqiBzz
立即下載 | 全新《星島頭條》APP :https://bit.ly/3yLrgYZ
