商台有連續有個案確診新冠肺炎，早前《十八樓C座》三位主播金剛、朱雪梅、陳慕賢，以及《公子會》劉翁。今日商台DJ麻利（原名鄧慧妍）亦在社交網宣佈確診Omicron，但未有透露幾時染疫，而現在仍在家自我隔離及休息中，她有份主持的節目包括《Mali Mali Home》、《麻利有隻小綿羊》，和跟鄭裕玲（嘟姐）、余迪偉一齊主持的《口水多過浪花》。
麻利在Facebook分上下兩集，細述病發經過、病情及自救方法，她寫著：「我居然都中咗Omicron！瀨咗嘢！（不過一街都係已經好平常了？）先聲明一路唔講係因為我真係瞓好多，冇嘢俾休息更重要，瞓到好似入咗時間艙咁，出返嚟個天已經有飛碟周圍飛嗰種不分日夜同年代去瞓。」
麻利透露有發燒、喉嚨痛、四肢無力等症狀，寫著：「講返基礎資料：🌻冇打過針🌻選擇用中藥🌻冇食過panadol🌻有調頻TimeWaver🌻病徵算明顯同好大幅度上落」，使用快速測試棒後見到兩條線證實染疫，她說：「平時重感冒喉嚨痛係火燒感覺，但Omicron嘅喉嚨痛係你喉嚨俾鎅刀𠝹傷咗咁痛，每吞一次口水就翻鎅一次。係刀傷鋒利劇痛。」
對於連日被追問檢測結果，麻利就帶點激動：「我覺得大家唔好迷戀一個檢測答案。有病嘅人要自己坦白面對身體有唔妥，而唔係望住一條線兩條線嚟決定做乜......come on，醫病係醫個人唔係醫兩條線。不過仲有人夠膽叫我出街檢測。我喎！燒緊啦喎！行走中的Omicron啦喎！仲出街？自問冇力揸車，即係走去坐車？咁我點確保我冇傳染俾人嘅危險？去到呢度我覺得呢個病贏係贏在個腦。輸？輸在冇人肯用下腦。但我知，好多公司要求員工有官方證明確診先會唔扣假之類，搞到人人急住出街抵住病要排隊檢測，否則又話你曠工，呢啲公司、呢啲話事人，同香港一樣！病到忽咗！醒未呀大家！」
商台回覆謂：「本台主持麻利亞初步確診，最後上班日期為2月14日，工作期間均有佩戴口罩。為安全起見及專業醫生意見，本台已經即時安排清潔和消毒有關工作地點，相關節目的同事，由事發起七天進行自我家居隔離，每天盡量進行快速檢測，並且匯報檢測結果給公司，以麻利亞最後上班日期起計七天，即2月20日，只要《口水多過浪花》之團隊完成快速測試為陰性，已屬安全，2月21日便可如常上班。」
更多第5波疫情資訊，請到以下專頁瀏覽（按此）
立即下載｜全新《星島頭條》APP：https://bit.ly/3yLrgYZ
