陶大宇受訪電台節目《舊日的足跡》，入行39年對獲封「師奶殺手」，原來當初他並不太習慣。他笑稱當時還後生，應該是「少女殺手」才對。當年陶大宇主演的電視劇《壹號皇庭》、《刑事偵緝檔案》等都錄得超過40點收視，非常受歡迎，後來他也漸漸習慣了「師奶殺手」這綽號。
陶大宇知道黎耀祥最近不時在訪問中提起自己，他說要多謝祥仔，當年拍攝《影城大亨》8、9個月日對夜對，故感情非常好，並重申：「我並唔係乜嘢大恩人，佢有同我分享買樓嘅事，（請佢去內地登台）完全唔係因為供樓原因，主因係我哋拍完劇唔捨得對方，我想用工作去延續我哋嘅友誼。」他大讚祥仔好念舊，「佢做三次視帝我覺得都唔夠呀，佢除咗苦盡甘來之外，再加上自己努力，大家見到佢嘅成就，第一件事唔使講，拍咗手掌先！我哋好好感情，雖然最近見面少咗，但都好留意對方！」
有傳陶大宇會客串TVB的處境劇，他表示暫時未有收到邀請。若然收到邀請，時間上能配合，劇情又惹笑的話，不排除這個可能性。談到現時的電視台小生，陶大宇認為洪永成是可造之材，只要對方多拍劇，假以時日一定有成就；另外，他亦欣賞余德丞，認為待對方更成熟一定可以發圍，成為新一代「師奶殺手」。電視台花旦方面，陶大宇看好視后蔡思貝，他說蔡思貝以往演戲比較「飄」，現在演得穩固紥實，進步得很快。
疫情之下，演藝人員也受影響。 「入行幾十年，最難過是去年在疫情下，（我）曾經有9個月坐喺度。藝人要喺工作裏爭取優越感，無論大事定係小事，我都有一個宗旨，小事當大事做。冇工作時好痛苦，我靠煮飯、運動度日。心情好負面，買餸都唔開心，再冇心情去街市打牙骹，全程苦口苦面，買完即走，直至疫情稍為穩定我先決定再北上工作。入行39年我依然可以係跑道上跑，證明自己無入錯行，仲做緊自己鍾意做嘅嘢。唱《倒轉地球》意外人氣急升，最近我冇機會見到華仔（劉德華），我喺大氣電波同佢打個招呼，希望佢唔好怪我攪到佢首歌咁樣！我只係想帶歡樂畀大家。我會繼續唱落去、撥落去，因為我相信以後唔唱《倒轉地球》落唔到個台！」
更多新冠疫情資訊請到以下專頁瀏覽：（按此）
立即下載｜全新《星島頭條》APP：https://bit.ly/3yLrgYZ
