3月3日，大致多雲，初時部份地區有薄霧，日間短暫時間有陽光。雖然俄烏衝突持續，但鮑爺已表示唔會大幅加息，不過目前判斷會否推遲加息言之尚早。投資者則解讀為3月唔會一如之前一次過加息0.5厘，美股隔晚做好，三大指數反彈，道指回升596點；標指則升80點；納指升219點。睇返澳洲央行議息就維持利率不變，市場預計澳央行延至7月先會加息，至於聯儲局將於本月議息，喺俄烏局勢緊張下，3月大幅加息機會大減。不過油價跟大宗商品價格則隨地緣政治局勢緊張下持續飊升，令通脹壓力未能得到緩解。

中國公布2月製造業數據，官方跟財新製造業採購經理指數，皆見反彈於50水平以上。原材料價格和運輸成本上升，對企業利潤有壓力。市場關注刺激政策，內地股市表現牛皮靠穩。香港則喺疫情肆虐下，今個月港股表現難見樂觀，指數權重股表現疲弱，即使港股目前已呈超賣，22000關能否見支持仍難料。

目前已有32個國家宣布對俄實施制裁。俄羅斯作為基礎資源品輸出大國，局部衝突將對原油、煤炭、有色金屬及鋼材等短期供需造成較大衝擊，甚至帶來長期供需格局轉變。由於對內地進口商實施貿易限制，影響進口俄羅斯煤炭，導致內地煤炭價格上升，帶動煤炭板塊昨股價做好。此外，喺需求端繼續增加，供給端彈性很小的情況下，煤價易漲難跌，保持高位震盪後再上行將是大趨勢，內地煤炭行業景氣周期將持續向好。煤炭股當中又以中煤能源(01898)走勢較為落後，預期喺今次升浪當中，中煤有條件後來追上，首目標先重返5.5元，下一目標6元至6.5元。

古天后

(徐狄怡，證監會持牌人)