近日新冠肺炎疫情嚴峻，不少公司機構如港鐵的員工也中招，連帶影響公司運作，令無中招的員工工作量大增，不勝負荷。有網民昨日在某屋苑的居民聯絡組的FB專頁中，報稱見到一名速遞員坐於行人通道旁，以手推車用作飯檯並除下口罩食飯，該網民斥該速遞員影響衛生，又聲稱已向物業管理公司及保安公司投訴。
林盛斌（Bob）亦有留意這單網上事件，但他卻不是認同投訴的網民，而是為該速遞員抱不平，他留言：「呢個世界，好多嘢，冇百分百嘅啱定錯，但係有一樣野（嘢），係最基本嘅，就係包容。呢段日子，對速遞行業嘅影響非常之大，因為人手不足好多時一個人要做三個人嘅嘢，一日幾萬單確診嘅時候，佢哋仍然辛苦工作，其實我真係好尊重每一位做速遞嘅工作人員。」
而Bob續說：「你估如果佢有得舒舒服服坐喺餐廳入面食嘢，佢會唔會選擇坐喺個垃圾桶旁邊食呢個飯盒？人哋已經匿喺一個盡量唔影響其他人嘅地方，諗住嗱嗱聲扒埋嗰兩啖飯就繼續送貨送件，然後你影咗佢張相放上網諗住公審再去投訴，其實唔可以話你唔啱，你係有你嘅道理嘅，只不過成件事，好冇同理心，好唔善良。」Bob最後謂若果此速遞員真的因投訴成立而被解僱，他會第一時間幫對方搵工，而不少圈中好友如袁偉豪、陳敏之、孫慧雪、吳若希及陳自瑤等皆留言支持。Bob回覆《頭條娛樂》時表示：「其實我喺網上見到呢件事，我自己覺得好傷心，因為呢啲只係好基本嘅同情心，但係原來有啲人真係冇。如果因為呢件事佢真係冇咗份工，當然我能力範圍內係可以安排到一啲工作俾佢做，但最感動嘅係，我出完個post之後收到好多朋友嘅message，話可以隨時幫忙畀工作佢，亦都有佢嘅同事留言畀我，話佢都睇到，好多謝大家嘅關心。」
更多第5波疫情資訊，請到以下專頁瀏覽
按此
https://bit.ly/3yLrgYZ 立即下載 | 全新《星島頭條》APP :
