美國聯儲局上周一如預期加息0.25厘，並樂觀評估美國經濟，帶動美股上周創下自2020年11月單周最大升幅，道指一周升5.5%，標指跟納指一周分別升6.1%及8.1%。分析對美股後市表現較為保守，雖然有部份分析認為早前美股急挫，係因為悲觀情緒造成過度拋售，不過現貨市場表現強勁與通脹預期升溫，大宗商品仍然係最好風險對沖工具。而美國嘅加息計劃令人感到擔心，有分析指認為若聯儲局遵循今年每次議息會議都將利率提高0.25厘嘅話，會重創美國房地產市場，令美國經濟陷入衰退。無論點樣加息，最終利率都唔應該超過2.5厘，否則對股市係極度負面影響。
至於港股上周出現大逆轉，周初連續兩個交易日跌逾千點後，恒指跌至近18000點水平後，內地傳出國家隊入場，周二跟周三不僅港股大幅反彈逾千點，內地A股亦絕對反擊。暫時仍難肯定上周係短線反彈，抑或完全轉勢，不過短線港股喺18000水平已成功搵O左個所謂政策底，預期恒指反彈至20日線左右，約22000水平或進行回調，或於20000至22000點之間整固。不過港股經過接近兩個月拋售以後，估值上有一定優勢，可於20000至22000水平收集重磅股。配置上，持續關注在「穩增長」持續加碼下有望受益嘅內房股，以及景氣度高嘅新能源股份，至於科技股仍取決於監管係唔係已告一段落，或規範化進行。
古天后
(徐狄怡，證監會持牌人)
