3月23日，密雲，有驟雨，早上雨勢較頻密，天氣清涼。市場開始消化加快加息步伐，較強硬嘅貨幣立場，美股三大指數反彈，道指升254點；標指跟納指分別升50點及270點。鮑爺講話漸變鷹，佢表示緩解通脹為今年首要目標，已準備好一旦有需要，將於下次議息會議決定把聯邦基金利率上調半厘，更不排除多於一次上調多過四分之一厘。反映利率期貨市場的芝商所FedWatch工具顯示，聯儲局在5月加息0.25厘的機率為38.4%，而加息半厘則有61.6%。

隨住聯儲局變得更加鷹派，近幾個月美國兩年期和10年期國債收益率大幅收窄。如果收益率變為負數，則可能表明經濟衰退即將來臨，咁即係較為鷹派嘅貨幣政策，可能又需要進行調整。如果核心通脹即將見頂，原因包括今年聯邦政府支出減少、廣義貨幣（M2）貨幣供應減少，以及通脹能自我調整，高物價將降低需求，有助於緩解價格壓力，但通脹唔會咁快回落至2%，但貨幣政策又難以太過強硬。細摩繼續維持好友立場，指市場已大致消化壞消息，建議投資者可入市，不過同時調低標指年底目標150點，至4900點。不過古天后就唔敢太樂觀，最擔心嘅都係一旦滯脹發生，聯儲局面對兩難局面，股市就更加唔知可以點面對滯脹。

至於港股呢邊，上周二嘅18200點可視為政策底，暫時港股仍然處於反彈浪之中，並一級一級咁向上推進，目前已成功收復10日及20日線，但對於要向上收復50日甚至100日線，古天后仍有所保留，畢竟以今輪跌浪黃金比計算，恒指反彈至22500水平，將會遇到極大阻力。以目標牛熊重貨區分布嚟睇，今日22000嘅熊證將會壽終正寢，下一步有機會進一步推進至22300至22500點殺熊。不過睇返呢兩日嘅成交，明顯比起上周三，四V型大反彈嘅成交額少咁一大截，反映上升動力持續減弱，升幅只集中喺幾集重磅指數股，有少少乾挾指數嘅意味，要話港股已完全轉勢，言之尚早。目前港股處於反覆嘅反彈浪之中，只能步步為營，仍未宜過度樂觀。

古天后

(徐狄怡，證監會持牌人)