今日何廣沛在電視城宣傳TVB新劇《食腦喪B》，對於新劇終於出街感到很開心，笑指劇集拍了兩年，當時正值第一波疫情，故部份劇情與疫情有關。何廣沛曾擔心劇情會過時，想不到兩年後現在仍是適合，希望能勾起大家的共鳴。
何廣沛有份主持的綜藝節目《真係唔好笑》最近有不少是非，包括有傳製作費逾千萬、但高層曾志偉看完覺得「真係唔好笑」而擱置播出時間；又有指另一主持麥美恩不滿何廣沛「懶懶閒」的態度，何廣沛對傳聞一一解釋：「首先我不知曾生嘅睇法，因為無見過佢亦都冇問，節目幾時出街係公司安排，正如我呢套劇拍咗兩年先播出一樣。至於千萬製作費真係講你都唔信，邊有可能，但實質幾多我都唔知，有傳公司打本比我哋包拍，但我只係一個幕前，收騷錢主持節目，製作部份有製作團隊處理，我哋只係去玩，我唔係幕後，冇可能現場指揮畀意見。」
至於傳麥美恩不滿他懶散的工作態度，何廣沛表示：「我喺TVB工作10年，合作過嘅對手拍檔都知我係好認真，而且我同麥美恩及馮盈盈係節目主要主持，唔存在邊個做多啲邊個唔做嘢，監製都喺現場，大家會一齊傾點玩。」何廣沛又說慶幸與麥美恩合作，因自己在主持方面是新手，不及她有主持大騷的經驗，強調大家相處很融洽：「如果我工作唔認真，依家都無機會做訪問，如果唔信可以問其他人。」
同場的陳曉華早前不幸受傷，問到被指力追她的方力申可有送上慰問？陳曉華強調二人絕對無拍拖，又說只有正在拍攝新劇的同劇演員知她受傷。至於盛傳方力申送狗力追，陳曉華說：「乜都無，雖然我哋係識，但唔知點解會傳緋聞，我本身相信一見鍾情，好睇感覺，我鍾意韓劇嗰一種，跌銀包會幫我執之類，但依家都未出現，我想專心工作，無時間談戀愛。」
更多第5波疫情資訊，請到以下專頁瀏覽
按此
立即下載 | 全新《星島頭條》APP : https://bit.ly/3yLrgYZ
