5月5日，大致天晴，日間炎熱。美股隔晚顯著上升，主要係鮑爺對息口走勢態度略為軟化，由之前幾鷹轉為中性，聯儲局宣布加息0.5厘之後，鮑爺表示排除未來單次加息0.75厘，消取市場對聯儲局加快收水嘅疑慮，刺激投資者入市態度轉趨正面。道指升932點；標指升124點；納指更升逾3%，急升401點。不過三大指數喺形態上只係技術反彈，升勢能否持續，要睇道指係咪可以企定定喺34000點之上，而標指跟納指又能否突破4400及13500嘅阻力。

美國加息步伐未見加快，10年債息略為回落至2.92%，不過30年債息仍然高企喺3.04%水平。其實美國未有加快收水步伐，主要原因係美國面對通脹高企之際，經濟數據跟就業數據都反映美國經濟有陷入衰退嘅可能，當然無乜條件好激進咁加息。市場並非一面倒睇好美股後市，細摩CEO戴蒙表示，油價高企，加上俄烏問題令冷戰響起警號，一旦俄烏局勢惡化，對歐洲經濟可能構成嚴重打擊，甚至引發經濟衰退。其實美股近日極大嘅波幅，正正係處於熊市中嘅走勢特色，暫時仍難言轉勢。

至於港股噚日成交竟回落至750億元，喺北水缺席下，成交縮水屬意料之內，但縮減至低於1000億元，實在少得可憐，唔單止無新資金入場，就連場內資金亦無意參與，買賣兩閒。今日北水回歸，究竟係喺21000樓上高追掃貨，抑或見好就手沽貨套現，將會決定今日港股跟隨美股做好高開後，能否企穩，抑或高開低走。港股暫時都係上落市格局，資金唔願意高追，甚至係缺乏入市興趣，但以港股估值計算，蔗渣嘅價錢，再大手狂沽亦無利可圖。上上落落，大戶喺成交薄弱下，上下其手，睇住啲衍生工具嚟開餐。暫時牛熊證比例為67%對33%，牛多熊少下，指數向下壓去劏牛誘因較大。

值得留意中信行(00998)宣布供股，內銀需要資金去配合阿爺放水，向市場抽水並唔意外，尤其中信行嘅資本充足比率，喺內銀之中較低，集資去壯大資本亦無可厚非。問題係其他內銀會否有樣學樣，陸續向市場伸手抽水，引發內銀集資潮。而阿爺一邊叫放水，但內銀則向市場集資，市場又何來咁多資金應付需要，搞嚟搞去，中港股市都係缺水惹的禍，令兩地市場喺估值低迷下，仍未見有資金大手吸納。