MIRROR成員「教主」盧瀚霆（Anson Lo）正忙於拍攝劇集《百萬同居計劃》，他在限時動態分享神徒感謝《百》劇組對Anson Lo的照顧，Fan Club送上豐富美食，小小心意為劇組團隊加油打氣。片中有長腳蟹、燕窩、生果、鮑魚撻等等，其中花姐拿起鮑魚撻，Anson Lo問花姐好食嗎？花姐表情很搞笑，一邊食一邊搖頭，是好食到搖頭。此外，陳子豐擔當「整蟹大師」，親自主理長腳蟹，望住眼前的長腳蟹開心到哈哈大笑。Anson Lo多謝神徒們的食物，還透露劇中大宅場景已拍攝完畢，只剩下幾天外景。
另外，Anson Lo新歌《King Kong》在社交頻道上架4天已突破175萬點擊，成績令人鼓舞。日前他在社交網撰寫千字文發表感想：「準備呢首歌之前，花姐問我想做咩類型嘅歌，我答：『我想做一首大家未聽過Anson Lo唱嘅跳唱歌。』」
他很開心再跟填詞人Oscar Lee合作：「寫出咗一份我認為適用於任何職業、情景下嘅『競爭』同『比較』。唔止係我依家嘅職業，細個時我家姐同我都有一種無形嘅比較，學業上同言行舉止上；去到小、中、大學同同學嘅比較、教跳舞時舞技嘅比較，相信我哋每個人每一日都經歷緊比賽。而《King Kong》好想帶出即使呢個世界嘅競爭幾激烈都好，只要你有進步同努力嘅心，每個人都可以做自己嘅第一，做自己最強大嘅King Kong。King Kong再強大，都未必能夠同其他人比，因為每個人嘅King Kong強大嘅地方都唔一樣。」
Anson Lo首次執導拍MV指出需要體力及腦力：「要應付平日自己嘅工作加上劇集拍攝，時間比以往拍任何MV更加唔夠用，拍攝當中休息嘅時間好少，因為每一刻都要主導同決定拍啲咩～ 但我好享受成個創作同執行嘅過程。」新歌MV開首他是向電影《The Maze Runner》致敬：「MV裏面，大家一齊玩緊一場生存嘅競爭遊戲，有人為咗搶到枝水而傷害別人，有人面對競爭只會坐以待斃，有人會願意同人分享，有人會用奸險手段達到目的。最後即使枝水倒瀉咗，兩男都繼續因為唔憤氣而作冇意義嘅鬥爭，導致兩敗俱傷。」
「記得第一次畀教母睇完MV first cut，佢話：『大家搞咁多嘢就係為咗支水呀？』有時往往當局者迷，『比賽』中嘅『競爭者』認為最後爭奪到嘅嘢好大件事、好重要，可能跳出嚟睇，未必係一件值得要佢哋互相踐踏去得到嘅事或物件。所以從來比較只須同自己比，競爭只需要同自己爭，做到自己嘅最好。」
Anson Lo知道每次的成品不會完美無瑕，有好多方面可以做得更好，不過今次是他好喜歡﹑花盡心思的一個Project，他好多謝每位神徒的支持，他知道近日大家因為撲飛有好多壓力及不開心，希望這首歌成為其中一樣陪伴神徒度過每一日的元素。
星島新聞集團慶回歸25周年專題網站，請即瀏覽
立即下載 | 全新《星島頭條》APP : https://bit.ly/3yLrgYZ
