衛蘭演唱會2022丨鄭中基任首場嘉賓 Janice緊張到口窒窒

一連三場《衛蘭 BE STILL LIVE 2022演唱會》昨晚（9日）於紅館開鑼，衛蘭（Janice）相隔四年再踏紅館開騷，特別請來鄭中基（Ronald）打頭陣做嘉賓，獲Ronald送上一個大大的擁抱，Janice怕怕羞不停表示：「我好緊張，好緊張呀……好多謝你來做嘉賓，我想同你合作好耐㗎嘞，嗰陣你唱我嗰首《十個他不如你一個》……所以我今晚好緊張，好開心認識到你！」Ronald笑說︰「我都估唔到你請我做嘉賓，多謝你請我嚟……哈哈！我都好想搵你一齊唱《十個他不如你一個》，因為首歌好好聽，好想唱，但係又唔夠膽問你，所以我咪自己唱囉。」隨後Ronald獨唱《My only one》，之後搞笑說：「又到咗『匪夷所思』時間」，即引觀眾起哄叫他講匪夷所思笑話，不過Ronald就鬼馬叫大家去他的Channel收聽。

一連三場《衛蘭 BE STILL LIVE 2022演唱會》昨晚於紅館開鑼。

Janice一見鄭中基就表現怕怕羞羞，不停話：「我好緊張」。

Ronald獨唱《My only one》。

妹妹衛詩都係嘉賓之一。

此外，Janice還邀請5位好姐妹︰鍾舒漫、鍾舒祺、Shimica、Reanne以及妹妹衛詩同台，鍾舒漫更泛淚分享早前的失聲經歷，令她失去人生價值、非常痛苦，多謝Janice一直義無反顧話等佢一齊上台，及不停給予鼓勵，她才可以康復，場面感人。

修身見成效

演唱會尾聲，janice以《大哥》作最後一首歌，但歌迷全部不肯離場，不停安歌再安歌，結果Janice 一共安歌了四首歌：《就算世界無童話》、《My Love My Fate 》、《愛你還愛你》等等，歌迷才依依不捨離去。整晚Janice一共換了五套衫，無間斷騷腳，這兩年做gym修身，果然有成果，比之前更fit，所以成晚不停有歌迷大叫「你好靚呀」。搞到janice 尷尷尬尬開心笑又唔識點回應，只識得不停話：「哈哈...多謝...thank you....」。

此外，昨晚《聲夢》一班同學仔鍾柔美、何晉樂（Rock）、張馳豪（Aska）等，與及岑寧兒、陳詠謙、Aiden Hung 、應昌佑亦有到場支持。