七仙羽（七師傅）將於8月舉行一連兩場《師傅七都識唱笑會》，她分別會以小丸子、白雪公主、神奇女俠、小仙女及女唐僧等百變造型現身。唱笑會內容主要來自她曾主持的節目《七救星》、《七福星》等，當中更包括唱歌、跳舞、Talk Show，保證內容豐富！一向圈中人緣好的七師傅表示內部認購門票反應熱烈，嘉賓陣容強勁！
採訪：張樂施 文：楊凱晴 圖：朱偉彥
工忙繁忙的七師傅表示這次演出的籌備時間很少：「重點會練唱歌，其他嘢都係臨場發揮，平時我上台做嘉賓都無夾過，但係唱歌跳舞就唔得，要記歌詞、記舞步。」從沒學過唱歌的七師傅，坦言今次是個大挑戰，而且工作實在太忙，她表示：「平時又要拍廣告、拍節目、見客做生意，我唔係全職藝人，有人問我點解唔搵下世老公（張敬軒）教唱歌？我唔敢，話明係下世老公，今世timing唔啱。」
談到上次做張敬軒紅館騷嘉賓，七師傅表示猶如發了一場夢：「好難忘，但係太多缺點，今次觀眾俾錢買我表演嘅飛，所以都要做好啲、專業啲，對人有交代！」至於唱笑會海報印有多個不同造型，她笑言：「我諗大家都唔會好期待我唔着衫或者着好少布，其實着唔着都冇乜嘢睇嘅，我主要都係着返海報上嗰啲衫。」
想請Viu眾星做嘉賓
今次唱笑會將拍住潘紹聰一起為大家鎮宅、辟邪、招財、旺丁，被問會否加入靈異環節？七師傅透露：「到時想講咩就講咩，會有少少靈異事件，但唔會好恐怖，都係搞笑成份。」至於內部認購反應熱烈，她笑言：「今次飛唔夠賣，好多人問我攞飛，多謝大家支持！」雖然實名制購票能阻止炒賣，但七師傅表示不會考慮採用實名制，因涉及太多行政管理，但很感激身邊好友支持：「好多人支持，整個流程好順暢，好感恩，感謝我下世老公喺IG幫我宣傳，佢出個post都好貴，好感謝佢免費幫我，好想佢嚟做嘉賓。MIRROR、ERROR、COLLAR等的ViuTV Artist都想請。」
星島新聞集團慶回歸25周年專題網站，請即瀏覽
立即下載 | 全新《星島頭條》APP : https://bit.ly/3yLrgYZ
