陳葦璇最近簽約環球唱片，推出出道7來首支慢歌《一個傻瓜一個啞》，她自言是親身經歷，以往曾是個傻瓜女友，有不滿都只會啞忍，最後搞到情緒爆煲分手收場。簽約新公司，葦璇坦承最希望能夠舉行首個個人演唱會，但自知根本不夠歌，所以目前首要任務先推出更多新歌，嘗試更多不同曲風。採訪：杜杜 攝影：沈健程 服裝：theoutnet 場地：馬哥孛羅香港酒店
葦璇簽新公司推出第一首歌，令人驚訝不是她最擅長的跳唱快歌，她解釋心態就跟參加《全民造星III》決賽時，選唱了林憶蓮的《願》一樣，「細個參加好多歌唱比賽，100場得一兩場會唱慢歌，都係規定一定要唱先唱，今次對我嚟講係個全新出發，要改變一下自己，就算幾驚都好，一定要踏出嗰一步。」
破紀錄花80個鐘錄音
最終葦璇破個人紀錄，花了80個鐘才能完成錄音，初期是未搵到唱慢歌感覺，後期因她拍完MV投放感情更到位，監製舒文決定重頭再錄。演繹完MV角色令葦璇有轉變，只因她以往拍拖也有類似經歷，「通常對方去旅行或者出trip，每日都會報到，嗰時我知佢有啲嘢煩，出trip連續4日都唔搵我，雖然我心情係非常糾結，但都係選擇唔去爆佢，可想而知我係個幾忍得嘅女朋友。」不過結果她忍無可忍，年多後分手收場，所以她現在跟拍拖多年的舞蹈員男友，會選擇多溝通，她甜住話：「都係一個保鮮嘅秘訣嚟㗎！」
講到跟新公司合作目標，葦璇最希望兩年內開到首個個人演唱會，「我最想儲多啲大家熟嘅歌，有代表性嘅歌，然後可以開concert，嗰時《造星III》決賽，因疫情係一個觀眾都冇，我真係想感受一次full house好多人嘅演唱會，對於演唱會我係有好多諗法，因為我平時都係睇Lady Gaga同埋Beyonce 嘅Super Bowl嘅，哈哈！」不過葦璇自知未夠歌開騷，暫時首要目標都是多製作新歌。
星島新聞集團慶回歸25周年專題網站，請即瀏覽
立即下載 | 全新《星島頭條》APP https://bit.ly/3yLrgYZ
