黃凱芹（Chris）昨晚假紅館舉行《細聽•黃凱芹35周年》演唱會，蔡一傑、湯寶如、葉童、黑妹李麗霞及Uncle Ray等也有前來捧埸。身穿閃爆黑色直間西裝配披肩的Chirs，唱出歌曲《請你回來》、《焚情》及《若生命等候》為演唱會揭開序幕。相隔10年再開紅館騷，Chris表現得興奮，與舞蹈員載歌載舞外，亦表示要聽到很久沒聽到的歡呼聲，Chris透露今次個唱從構思、籌備到準備只用了50日時間，他說：「難得喺紅館，雖然搭台後只係夠時間踏台板，但點都要嚟！」之後他又感激歌迷35年來的支持，更專誠多謝Uncle Ray前來睇騷，又指因是臨時知道他前來，故沒有準備英文歌，所以叫觀眾一起合唱《We Will Rock You》給Uncle Ray聽，之後他又叮囑Uncle Ray若覺得悶、夠鐘瞓覺等要離開也不需要通知他：「身體要緊，最緊要安全至上，唔好除口罩，聲音太大或冷氣太凍話我知，我幫你較細啲。」
【點擊睇黃凱芹演唱會靚相】：
在唱出自已創作的《499次擦肩而過》前，Chris回憶剛入行時被稱為「怕醜草」，當年fans經常在電台、地鐵及錄音室等地方等他，但卻因要趕時間而來去匆匆，故fans每次見他都會説：「搞錯呀！」，他形容這句口頭禪是一個美好回憶，也成為他的動力，因代表有人默默守候自己。當唱出第一首推出的歌《再遇》時，Chris指若35年前如果沒有這首歌的話，今晚就不會站在這個台上，而他在演唱時更唱眼濕濕，唱完還要抹鼻水。
與周慧敏合唱《情未了》
之後全晚唯一嘉賓周慧敏（Vivian）身穿白色露背開叉長裙登場，與Chris合唱經典歌曲《情未了》，Vivian甫出場即引來全場歡呼，今次是她自老爺倪匡離世後首次現身公開場合，但見Vivian狀態仍非常不俗，與Chris合唱完即笑問對方剛才是否喊完？Chris表示是因唱《再遇》，當他想把手上紙巾掉丟時，Vivian說：「拋畀fans，而家興咁樣，你冇返嚟太耐唔知。」之後Vivian 又不諱言當Chris返港後打電話給自己時，對方驚覺她很快就55歲，Vivian笑説：「到80幾歲嗰陣，我哋就係同一個長者群組。」兩人又憶述一起在電台主持節目的趣事，Vivian指當年因借了Chris $3.6元買汽水後忘記還錢，搞到Chris好嬲，更嬲到做節目前找來一塊板隔開兩人，而數口精的Chris即時指若以九出十三歸來計算，Vivian現在欠他共$1,114.1元，但Vivian就笑指當年已還錢，之後更叫Chris聲演當年的「奶奶」欺負她這個「家嫂」，而兩人合唱完《劍合釵圓》後，Vivian就蹺著Chris的手落台。
唱《再遇》感動到有鼻水
完騷後，Chris承認唱《再遇》時突然悲從中來，感動到有鼻水，他笑說：「你知依家幾敏感，有鼻水（觀眾）會幾驚，所以要抹。」Chris指今次只開一場覺得未夠喉，雖然曾想在開騷日期前加場，但因舞台要更改到附合規格，不能有升降台及機關等搞到要改台板，故舞台在開騷前一日才搭好，他笑說：「今次舞台似行山，好多斜坡，又似單車賽道咁側側哋，所以行起來都要小心，尤其係啲dancers！」提到今次找來多年好友Vivian擔任嘉賓，Chris 指兩人對上一次在紅館合作已經是5年前，當時他為Vivian的30週年演唱會做嘉賓。Chris表示事前只知道Vivian會提起兩年當年合作的事情：「好多已經唔記得，佢提到我嬲，我都唔記得我有嬲過⋯⋯其實嗰時所有電台同事都話我唔請食嘢，我又車呢個放工、又車呢個返屋企，食嘢又我畀錢，呢啲冇計數㗎！」至於為何會揀選合唱粵劇？他說：「以前喺電台試過玩一次，今次專登搵咗6個中樂樂師錄音樂底，再加上舞台上17個樂手演奏，（冇錢賺？）係呀，如果有機會加場就有。」而Chris更透露剛因超時15分鐘，搞到被罰了五位數，令他感到不好意思。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
