9月22日，大致天晴，日間天氣炎熱。隔晚美國聯儲局議息，一如預期加息0.75%，不過鮑爺又放鷹，仲係相當鷹，美股衰收尾，三大指數齊齊跌逾1.7%。睇返標指下降通道底部為3500左右，一旦失守將迎來終極一跌，有機會跌至3000-3100水平。

FOMC會後聲明預期今年底息率將加至4.25%，即係11月議息再加息0.75%，12月則再加0.5%先達標，而鮑爺亦好明確表示2024年前都無乜機會減息，即係向之前預計明年開始減息嗰班友仔大潑冷水。睇返家下失業率不足4%，就業市場未見衰退，咁當然係抵抗通脹最為重要，美國未有條件可以減息。

明年減息無望，兩年債息升至4.098%，10年債息則升至3.54%，高過30年債息3.5%，出現倒掛。FOMC亦下調今年GDP增長至0.2%，2023年1.2%，2024年1.7%，都咪話唔濕滯。即係美國處於低增長，高通脹嘅滯脹局面，美企嚟緊一段日子盈利表現將大不如前，美股估值又唔算特別平，睇嚟都無乜資格長升長有，今明兩年美股可能要捱一段日子。

美國加息資金流向美元區，美匯升至111.5，歐元跌日跌人民幣都跌，人幣跌至7.08水平，中概股被拋售，今日港股都唔會有運行。早幾日都講咗港股進入陰乾局面，喺無成交支持下，彈都唔係好識彈。3月港股落到18200水平，即見有大量買盤湧入，成交高達3000億元，淡友被逼平淡倉，將大市推高至22000水平。假設當時入市嘅資金係成功抄底，當今次大巾再回落至19000樓下，3月抄底嘅資金理應入場護盤，但呢兩個月成交已縮晒水，反映當時抄底嘅資金，已經係其後反彈嘅時間，成功走人套現，因此再無護盤需要，換句話講，所謂18200嘅國家鐵底已唔存在。如今外圍疲，人仔又跌穿七算，18000心理關口能否死守，似乎係瓜多過菜。人家上證阿爺開到聲話要保3100，國家隊要守都守住A股為先，港股只能自求多福，且看港府能否盡快再放寛入境措施為港股充喜，若未能盡快通關，從新與國際接軌，港股亦只能步向陰乾尋底嘅命運。