10月10日，大致天晴，早晚天氣較涼，非常乾燥。上周五美國公布非農數據，無論大小非農數據都顯示美國就業市場仍然強勁，換句話講美聯儲局仍大有條件繼續加息，美股三大指數上周五大跌，納指跌幅達3.8%，道指跟標指則分別跌逾2%，好明顯短暫嘅反彈又告一段落，美股再回復跌勢。尤其經過上周反彈後，本來嚴重超賣已得到改善，即係美股喺技術上，又再有大把下跌空間，暫時標指支持位喺3500點，納指支持位更為遙遠去到10000點左右。之前大家應該有留意到，唔少重磅科技股如蘋果公司跟Tsela仍算硬淨，係美股最後一根蹈草，當呢啲較為強勢嘅龍頭股都失守，美股就會迎來終極一跌。

呢個星期美國分別有PPI及CPI數據公布，周五亦有零售銷售數據，加上火FOMC官員密集講話，呢個星期美股將會變得更動蕩。尤其係幾個反映通脹嘅數據，能否顯示通脹見頂回落，係左右市場情緒嘅關鍵。除咗通脹數據之外，仲有第三季業績期將由銀行股揭開序幕，而喺經濟放緩甚至衰退下，金融市場已轉差，定必影響銀行股業績，作為百業之母嘅金融業都唔掂，其他企業自然都係苦過dee dee。再加上強美元影響下，美企嘅業績定必大受打擊。

喺通脹高企下，市場期望油價可以回返啲，只可惜喺全球經濟不景氣下，OPEC竟宣布減產，並將油價底線設定喺90至100美元，即係油組為保護自身利益，都係會托住個油價。油價唔回，通脹唔落，各央行為咗抑壓通脹，無奈只有加息。加息拖累經濟，而股市亦會因為資金緊掘而向下，點計條數，股市都係易跌難升。

港股弱勢持續，上周三重陽節假期後反彈逾千點，但成交額僅回升至1000億元，周四成交額回落至625億元，周五更慘情已有570億元成交，唔單止係打回原形，甚至係比假期前成交更為縮水。當然北水缺席係成交縮水嘅原因，但本周北水回歸，又能否令港股起死回生，答案幾乎可以肯定係唔會。內地股市同樣面對缺水問題，甚至有傳聞指阿爺有指導二十大前唔准沽貨，內地A股都自身難保，唔喺港股掟貨套現嚟托A股已經偷笑，仲指望北水可以救港股，係不設實際嘅想法。今日港股跟隨美股周五下跌而裂口下跌係事在必行，上周三嘅裂口上升遺下佢大裂口，呢個星期回補呢個裂口機會甚大，港股又再一次向下尋底，反彈力度一次比一次減弱，港股一浪低於一浪形態無變，呢啲時候入場，真係自己搵自己笨。