10月28日，天晴，天氣乾燥。美股隔晚個別發展，早段道指一度升逾500點，資金明顯流向傳統經濟股，受科技股下跌影響，道指尾市升幅亦收窄至只有194點，而標指跟納指續跌，分別跌23點及178點。早兩日已提醒大家，標指跟納指已升抵反彈阻力，而道指則呈超買，美股將變得反覆，果然呢兩晚美股表現強差人意。

納指係三大指數中，明顯表現較弱，雖然美債息有所回落，但高息環境始終不利科技股，喺納指PE跟PB估值仍未算平嘅時候，資金唯有拋售科技股，而多間重磅科技業績公布後急跌，強如微軟季績仍錄得增長，但喺嚟緊一兩季增長可能放緩，股偎一樣要跌7%。至於好似Facebook呢啲，業績確係唔掂，股價就喺業績公布後急插兩成半。而亞馬遜公布業績後，股價亦曾急跌兩成，雖然跌幅最後收窄至12.8%，但重磅股跌一成，都咪話唔大鑊。不過美股跌到呢啲龍頭股，唔排除跌勢已接近尾聲，只係等終極一插再見底。

至於人民幣周三狂彈逾千點子後，噚日回落落返0.88%，中概股升勢受阻，隔晚中概股喺美股表現當然唔多理想，而噚日A股跟港股噚日表現較為反覆。A股跟港股缺水人所共知，內地基金經理為咗刺激基金銷售，竟然出到基金經理團購自家基金呢一招，希望能令市場重拾信心，真係只能講句，內地真夠創意，呢啲出人意表嘅舉動，真係只有中國先會出現。不過奇怪係基金經理寧願用手上資金去買入自家基金，而並非將資金投入股市，其實基金經理自己都唔多睇好後市。

至於港股表現反覆，但呢個星期每日成交都保持到喺1200億之上，有別於之前日日成交幾百億陰乾式下跌嘅情況，至於係嚟到呢啲水平，終見有資金肯入場接下貨。不過連續兩日港股升抵高位後，買盤就縮沙，又或者見沽盤借機逃生，好明顯係高位無人肯追貨，寧願等跌落嚟接貨。今日係10月期指結算，淡友今個月已立於不敗之地，淡友會否喺11月乘勝追擊，抑或鳴金收兵，好友有機會反擊，相信喺結算過後，但有較清晰方向。