疫情下香港人浮於事，有失業半年的樹仁畢業生早前在網上討論區自爆工作經歷，指「畢業後廢咗幾年畀老母捉咗去做清潔」，發現「一個月返21日工，一個月都有14K左右，但係每日實做都只係6個鐘左右」，擔心太留戀這個「舒適區」而一直做下去。有回應的網民鼓勵樓主行行出狀元，「學夠滿師咪自己創業囉」。
網民回應請點擊組圖瀏覽：
帖文以「樹仁畢業後廢咗幾年 畀老母捉咗去做清潔」為題，樓主表示，畢業後遇上疫情爆發，「輾轉就去咗做餐飲。半年前間小店做唔落去就關門大吉，跟住小弟一直失業至今。直到上星期，老母頂我唔順，話唔再養我，而家畀兩條路我行，一係就跟佢去做清潔，一係就踢我出門口。
如是者，我就跟咗佢做清潔。做咗一星期，我發現做清潔仲輕鬆同埋好搵過餐飲。好多時上午做兩、三個鐘就收$400；下午去另一個地方做又收$300，平均一日都收$700。咁我一個月返21日工，一個月都有14K左右，但係每日實做都只係6個鐘左右」，並指「好驚自己會一直做落去，唔想離開呢個comfort zone（舒適區）」。
學夠滿師自己創業
回應的網民指「有經驗可以轉做科文，仲可以入啲清潔公司做，同埋其實做得耐可以考慮開公司」、「做正行，正當工作，清潔又好，滅蟲都好，咪又係打工，學夠滿師咪自己創業囉，行行出狀元呀！」
另有網友指「我有同學都係做清潔+滅蟲，做咗5年自己開公司，包咗好多商廈清潔嚟做，啱啱買埋樓，諗起以前仲有份笑佢」、「樓主其實唔走都唔使擔心，呢行無後生做，只要你肯做，啲人見你又後生，一定大把job」，而且，「離唔離開comfort zone靠自己。利申：樹仁畢業，做過餐飲，做緊投行」。
不過，亦有網民慨嘆「話晒都大學畢業，讀書叫有用個腦，但出嚟做嘢用手腳加時間換錢，真係好浪費」。
說起清潔這行，有網友指其實搵到錢，「聽清潔姐姐講疫情前寫字樓清潔仲好搵，一日實做4粒鍾都有2皮幾，好多師奶去做」、「正職一份糧，跟住大廈入面d舖有時又會搵你清潔又有錢，跟手如果有d可回收嘅嘢執埋拎去賣又有下欄錢」。
另有人指，「做私樓豪宅仲好搵呀，班有錢人成日都掟d好嘢出嚟，有人試過執到surface laptop同幾千蚊外幣，仲有咩chanel袋，仲要有嘢包住」、「你去過馬己仙峽道，聶高信山啲豪宅垃圾房就知啲有錢人好離地，卡地亞手錶prada手袋都可以掉出嚟，聽過個保安講個女戶主被男人飛，嬲到將啲男朋友送嘅禮物掉走」。
帖文來源：連登討論區
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
