球王美斯一下妙到毫巔的直綫助攻摩連拿先開紀錄。Reuters
邊有咁精采㗎！噚日全港應有唔少人「射波」，無計啦當大熱巴西表現一般，超級巨星尼馬仍然在加時射入盡顯卡士的一球，而你以為可以收工之際，「加時之鬼」克羅地亞上演一下絕地反擊將比賽帶入十二碼，最終俄羅斯輪盤呢個遊戲怕且要改名為「克羅地亞輪盤」了，格仔兵又射贏。
再接住荷蘭對阿根廷，更令人血脈沸騰，球王美斯一下妙到毫巔的直綫助攻，再親自操刀十二碼，領先兩球，瞓得啦！第二朝仲要返工㗎！場波去到呢個階段，就連環出現火爆粗野場面，全場球證拉賀斯總共發出十六張黃牌，但完全控制唔到場面，阿根廷柏利迪斯省個波去後備席一幕，更將火藥味推上高峰。峰迴路轉，荷蘭在完場前以一次好有心思的罰球配合，追成2:2。我又以為美斯要走了，點知阿根廷在加時又反撲，連環攻門不果。最後，十二碼決勝，我已經精神衰弱。
今屆世界盃由分組賽到淘汰賽，各種扣人心弦的時刻，注定係史上最精采的一屆。 —馬高
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
