只要縮，只要怯，陣容再強嘅巴西都會痛哭而別。Reuters

當你睇緊呢篇稿嘅時候，艾爾已經睇咗兩場南美球隊八強嘅賽事，感受非常深。

巴西最後互射十二碼輸畀克羅地亞，連續兩屆喺八強出局。艾爾覺得巴西只有入波嗰下嘅組織較好睇，其餘時間無預期踢得咁好。上下半場中場輸送乏力，令兩翼進攻無援，但領隊迪堤只係不斷換相同性質嘅邊路球員，換湯唔換藥，嘥氣！

最離譜嘅係，球員喺加時上半場領先後，好似感覺任務完成，完全唔做逼搶，任由對手喺中場控制節奏，攔截強度亦大幅減低。簡單啲講，想守埋佢就算。就算迪堤喺旁邊不停叫球員上前壓逼，但場上嘅十一人繼續發夢。結果？咪出局囉！

相反，賽前睇得比較淡嘅克羅地亞，就繼續發揮佢哋強勁嘅韌性。今場球隊屯足兵力喺邊路防守，令兩閘防守負擔大幅減低。即使好多球員年紀有番咁上下，但係照樣踢到全場飛，三十七歲嘅莫迪歷走上走落，踢到加時都仲咁好氣，真係要寫個服字。艾爾更欣賞門將利華高域嘅超水準撲救，今屆佢絕對係球隊後防嘅定海神針，淨係今場作出九次撲救，已經係巴西門將艾利臣比加今屆撲救次數嘅總和。

後防堅如磐石，中前場發揮穩定，全隊相當有紀律。呢隊打不死嘅「格仔兵」打到入四強，不亢不卑係致勝的關鍵，而領隊達歷背後做嘅功課，同埋可以令到球隊咁齊心，一次又一次做「加時之鬼」同樣要畀啲掌聲。

一場比賽，譜寫兩種人生態度。只要縮，只要怯，陣容再強嘅巴西都會痛哭而別。靜待時機，永不放棄，陣容較弱嘅克羅地亞可以笑到最後。　—艾爾

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ