尼馬喺球場內外處事都愈嚟愈成熟。 Reuters
承先啟後巴西新支柱
巴西喺今年人才鼎盛之下出局，令好多朋友都嚇一跳。畢竟就算平時無接觸足球，都真係「細細過就聽過佢個名」，而且就連足球天書《足球小將》主角戴志偉嘅師父盧比度叔叔，以及世青篇Final Boss都係來自足球王國巴西。
巴西入面嘅大佬，就一定係隊長泰亞高施華，年屆三十八歲依然交出高水準表現，可惜長路有盡時，出局後佢心酸表示唔會再穿上國家隊球衣。正當筆者都好擔心一向稱唔上團結嘅巴西隊無咗呢位老大哥會分崩離析，估唔到會由一向予人感覺輕浮嘅尼馬向呢位老大哥贈上心靈雞湯，兩位射失十二碼嘅隊友洛迪高高斯同馬昆奴斯哥利亞，同樣收到尼馬短訊鼓勵。似乎就算施華退落嚟，尼馬呢位一直被認為活在美斯陰影下而場上表現誇張嘅球員，已不知不覺變成隊友間的精神支柱。
尼馬一度表示今屆係佢最後一屆世界盃，畢竟巴西人才輩出，下屆世界盃尼馬已達三十四歲，要競爭亦唔容易。但在出局後幾位巴西隊友都公開表示，希望尼馬能繼續為國效力，已變成老大哥嘅佢亦開腔表示會考慮。見到尼馬喺球場內外處事都愈嚟愈成熟，筆者都好希望下屆仲可以睇到佢充滿森巴味嘅表現。 -球樂
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
