季軍爭奪戰只係一個安慰獎。 Reuters
不知不覺，世界盃已經去到最後階段，剩番落嚟先開打嘅，會係今日晚上十一點開波，由克羅地亞對摩洛哥嘅季軍爭奪戰。
對去到爭標最後階段嘅球隊嚟講，季軍爭奪戰無疑只係一個安慰獎，所以過去幾屆呢個敗者之爭，競爭意味唔大。就好似二○一四年嘅巴西，或者上屆嘅英格蘭，佢哋呢場比賽就派咗部分副選上陣，亦非「打真軍」。況且今屆世界盃亦正值插喺歐洲聯賽中間，好多球員喺完結世界盃之後，休息時間並唔會好多。就以克羅地亞嘅摩迪歷同高華錫呢兩位球會中主力為例，佢哋球會比賽距離呢場季軍賽只係相差十日左右，舟車勞頓之餘再要調整狀態投入球會訓練，其實時間認真唔充裕。
再者，正常嚟講大家永遠都只會記得冠軍係邊一隊，呢個「世界盃季軍」就算贏咗刻在史冊上，都唔會令球迷留低深刻印象，實在食之無味，棄之亦唔可惜。
既然係國家隊爭冠無望，對一班球員嚟講，保持自己身體健康，返回球會再戰應為首要任務。大家心態都比較放鬆之下，似乎會好似過去幾屆嘅「爭三賽」咁，無乜火爆場面，但入波又唔會少。 -球樂
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
