隨著政府放寬入境檢疫措施，不少人亦急不及待到海外旅遊。有乘客在網上發文，批評有航空公司地勤職員的態度差，指自己沒有寄艙行李，在航班起飛前15分鐘到達航空公司的櫃檯打算辦理登記手續，職員卻表示已來不及辦理手續，「佢係可以即刻打電話畀閘口叫人等埋我但佢無咁做」。相關言論卻引起網民批評。
該名乘客日前在「香港討論區」發文，指自己沒有寄艙行李，在航班起飛前15分鐘到達航空公司的櫃檯打算辦理登記手續，並詢問在場職員能否趕及登機。樓主指，「佢好悠閑咁話『趕唔切㗎啦，搭飛機唔同搭巴士呀』，佢唔幫我趕飛機不特止，仲講埋啲有骨的說話！佢係可以即刻打電話畀閘口叫人等埋我但佢無咁做！」樓主續指，自己最終需要更改航班，但職員要求樓主自行致電預訂，直到自己拒絕離開，對方才提供協助，直斥「可以服務差成咁？可唔可以投訴？」樓主又直言，「真係好差的經驗」，並指日後不會再乘搭該航空公司的航班。
請點擊組圖瀏覽：
相關帖文隨即引起熱議，不少網民亦批評樓主的行為，直言「反省下自己先啦」、「15分鐘，你當搭巴士呀？你仲要過入境過安檢，仲話打電話叫架飛機等埋你？你邊位呀？有本事就自己買架私人飛機囉咁叻」、「打電話叫全機人等埋你？懲罰守時的人？」、「唔覺得地勤有問題」、「15分鐘100%趕唔切啦」、「未搭過飛機? 15分鐘仲要閘口等埋你? 幾百人等你一個? 地勤講得啱，你估搭巴士？唔好將責任推畀人，反省吓先」、「好大嘅官威」等。
部分人則認為，「樓主係唔啱，但地勤冇必要踩多腳，同埋reschedule都唔幫手，基本服務還是要有吧」、「佢唔應該對客講嘢有骨，但你自己遲咗就唔好要求人地叫停班機去等你啦」、「樓主係錯，但用香港服務標準嘅話，地勤一樣唔合格」等。
帖文來源：香港討論區
機管局建議旅客提早到達機場
根據機管局網頁資料，建議旅客提早到達機場，以便有充足時間接受護照及保安檢查。局方又指，旅客應於航班離港前最少30分鐘抵達登機閘口。在辦理登記手續方面，以國泰航空為例，官網列明沒有寄艙行李的乘客可直接前往接受保安檢查及辦理離境手續，然後再到登機閘口，並必須於航班出發前最少 30 分鐘抵達登機閘口服務櫃位出示旅遊證件。至於有寄艙行李的乘客，則可於預定出發時間前最少 50 分鐘前往自助登機行李寄艙櫃位辦理行李寄艙手續，並需確保於出發時間前最少 30 分鐘抵達登機閘口以避免不必要的延誤。遲到的乘客將不獲准登機，而登機閘口將於出發前 10 分鐘關閉。
