香港地少車多，泊車車位一向供不應求，經常出現「有車無位泊」的情況。今日兩名中年男子在何文田欲替其車輛尋覓公眾咪錶位，不惜「人肉霸車位」，但仍被駛至的私家車搶先一步。其中一名中年男子不甘被「截糊」，多次爆粗辱罵對方，批評他「打尖」將車駛入泊車位。有關車Cam短片在社交平台瘋傳，不少網民支持樓主做法，沒有向惡勢力低頭，「人哋架車未到，佢就人肉霸位！呢個係車位！唔係人肉企位！」
事發時間為今日（7日）上午11時許，地點應為何文田自由道。片中所見，一輛黃色私家車遂使前停泊公眾咪錶位，惟兩名中年男子拒絕讓私家車駛入，其中身穿灰色長袖衫的中年男子更情緒激動，多次以粗言穢語指罵私家車司機，「我X你呀，你老X，我架車泊喺垃圾站嚟緊，你有錢大X晒呀？畀你泊咪你泊囉！X你！」，而同行的中年男子中途亦一度加入理論，相反私家車司機非常平靜，沒有以粗口回贈，僅反問對方「你架車嚟咗未呀？而家變咗我唔啱呀？」，但灰衫男竟直指私家車司機不對，「緊係你唔啱啦，人哋等部車走，開緊部車過嚟」。
事後，黃色私家車車主在有關貼文留言交代事件起末，又指最後成功泊車，「我喺路邊等緊位，啱啱架車走咗我就泊入去。佢人都未企出黎，全條街又冇車 ， 我就老虎都唔會讓喇…梗係有泊，佢唔郁我唔郁，最後佢咪又係要走」。根據他上載的影片所見，當時私家車停在附近等位，見到前方有車駛離，遂使前停泊公眾咪錶位，惟兩名中年男子拒絕讓私家車駛入，甚至囂張地表示：「呢度霸緊位呀」。
網民反應幾乎一面倒，紛紛支持樓主做法，「你都泊定係到等，跟足規矩」、「唔係平、貴車問題，政府公家位，先到先得、睇彩數，個個都泊得，係啲人肉霸位講到自己合情合理！」、「人哋架車未到，佢就人肉霸位！呢個係車位！唔係人肉企位！」、「如果大聲就有錶位，我放支大聲公係車」、「人坐霸位都咁惡咁理直氣壯」、「不要向惡勢力低頭！」。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
