「愁哥」同「芝渣」呢一對，簡直係娛樂圈人辦。「愁哥」又點會鍾意女人，不過佢屋企一直俾好大壓力，要佢娶妻生仔。「愁哥」其實有個好好嘅伴，高大靚仔做嘢唔錯，呢個伴幫「新哥」打工，因而識到同佢做嘢嘅「芝渣」。一直想娶個女人返屋企幫助自己事業更上一層樓的「愁哥」立即出手，而「芝渣」九秒九受溝，本身佢都想生仔，貪「愁哥」有少少背景又官仔骨骨，借種都見得下人，二人就一拍即合。
結婚嗰晚，「愁哥」男友係台下喊到好似死老竇咁，大家都食花生食到好開心。「芝渣」份人多嘢講，但讀書少，「愁哥」婚後就全盤控制「芝渣」嘅一切，尤其係幫手令「芝渣」大肚威俾同期姊妹睇之外，以「芝渣」嘅救世者姿態出現，杜絕佢以前啲朋友埋身，仲得罪埋咁多年俾「芝渣」豐衣足食嘅「大老闆」，搞到對方話全盤封殺呢個反骨精，唔俾生路佢行。
奇就奇在唔知點解「芝渣」好似食咗屎咁，一直任「愁哥」擺布，完全唔識分是非黑白，將佢身邊心腹換走晒，然後有任何唔啱睇嘅就出嚟四處樹敵，「芝渣」就覺得佢乜都係為自己好，完全唔介意咁多敵人。
可能因為「愁哥」同老婆婚前約法三章，佢可以同伴侶繼續恩愛，但千祈唔好出街俾人見到，反正呢啲都係合作上演一場戲，要做就做得足啲，唔好令自己失禮。「愁哥」其實一早就飛起當日同甘共苦嘅伴侶，依家嗰位來自國內嘅小鮮肉，細自己十幾年又聽話，使費唔高。但呢啲嘢佢係從來唔同「芝渣」交代，總之「芝渣」人前幸福，又有小朋友令自己人生圓滿，事業只係「愁哥」個人私心，想老婆威自己威，「芝渣」真係無乜所謂。
【相關文章】：
星8卦｜模範夫妻爆離婚！小雲出軌發姣派帽 吉仔用成副身家箍煲
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
