第41屆香港電影金像獎頒獎禮將於周日晚（16日）舉行，本屆競爭相當激烈，為緩和氣氛，特別搵嚟憑《窄路微塵》首奪最佳男演員，亦是金像獎大熱影帝的張繼聰，膽拖 一眾 TVB、ViuTV藝人、導演及資深演員，嚴選死前必翻睇電影，笑片、愛情片、法國片及港產片乜都有，睇吓有冇你哋嘅心水。(另外，篇幅所限，詳細版請登入《星島頭條》APP。) 採訪:杜杜、方騫平 撰文:廖思慧
張繼聰
電影:《星際啟示錄》(Interstellar)
「我諗死前一定好恐懼，一定好驚，心裡面有啲好爛嘅戲，睇到一半就好想快啲死，解決咗死前嘅恐懼，就例如....我梗係唔會講邊套啦， 正面啲，揀《Interstellar》，講緊宇宙嘅維度，愛啦，喺我嘅信念裡面，人死咗唔係真係死咗，只係肉身嘅完結，靈魂嘅旅程係不滅嘅，睇得明你又有啲啟發，就唔會驚死，只係出發去另一個階段，睇完套戲就上機，去第二度玩，係咪好正先?」
梁祖堯
電影:《霧地異煞》(The Mist)、《正義迴廊》（The Sparring Partner）及《小飛象》（Dumbo）
「唔想亂咁答，個腦有500套電影LOAD緊，第一部會揀《霧地異煞》(The Mist)，突然出現啲濃霧，啲霧入面有怪獸，成班人困喺超市出唔到去，一出去就會死，超市入面出現咗個小社區，有唔同宗教唔同性取向嘅人，變成咗個社會，呢套超級好睇，好精彩嘅演技同劇本，我成日會翻睇，每一次睇都會得到唔同嘅嘢。」
「第二套揀《正義迴廊》，一套非常值得支持嘅本土電影，兩個舞台劇演員麥沛東、楊偉倫，有私心，兩個都合作過，好好嘅演員，兩個演大角咀支解父母案嘅犯，當年係一單奇案，個仔高調搵父母，其實當時已經殺咗，呢件事太傳奇，好鍾意呢套電影，拍得好好，好好睇。」
「第三套，《小飛象》，情意結，由細睇到大，每次睇都會喊，心靈有缺失時就會開嚟睇，買過好多版本，有錄影帶有LD，VCD， DVD，到藍光，到online streaming，一撳就睇到。由細到大有唔開心就會拎出嚟睇，睇到而家。天生有缺憾嘅大笨象，但佢搵到佢另一才能就係識飛，正能量到爆炸，識飛之後變成另一個自己，雖然細個好鍾意，但係一套畀大人睇嘅卡通電影。」
吳煒倫(《毒舌大狀》導演)
電影：《天使愛美麗》（Le Fabuleux Destin d'Amélie Poulain）
「當年心情唔好睇呢套戲，睇完出嚟覺得個世界美好咗，個衝擊力對我嚟講係好大，因為呢套真係一套好美麗好善良嘅戲，原來世界真係有美好一面。人生中最後一套戲，我覺得係呢部。」
趙善恆 (《一秒拳王》導演)
電影:《玩轉身前事》(The Bucket List)
「講兩個身份地位好唔同嘅人都要面對死亡，兩個喺醫院識咗之後，發覺大家都有啲嘢好想做，逐個剔走想做事項，好感人嘅戲，臨死前好啱睇。」
馬國明
電影:《JOKER小丑》(JOKER)、《華爾街狼人》（The Wolf of Wall Street）及《鐵達尼號》(Titanic)
「作為一個演員，一套就太難揀，我會揀兩套，一套係《小丑》，又或者係《華爾街狼人》，每一場戲每一個演員，每一句對白，都係build up個主角，成套戲所有嘢都係幫個主角，營造佢嘅character，作為演員遇到啲咁嘅角色，等同中六合彩。」
「如果同阿湯一齊睇，就會揀《鐵達尼號》，女仔鍾意睇愛情片，戲入面嗰段情真係好浪漫，雖然我無里安納度咁靚仔，希望再一次感動到佢。」
王浩信
電影:《真人Show》(The Truman Show)及《喜劇之王》（King of Comedy）
「即刻諗起兩套喜劇，一套係周星馳嘅《喜劇之王》，好多時喜劇係講一啲悲劇嘅人生，睇戲好多時想睇到強烈嘅矛盾同衝突，令我哋睇到好爽，同有共鳴，《喜劇之王》尹天仇個角色，可以影射到好多小人物嘅心聲，經過自己努力，再一次又一次經歷好荒謬嘅情景，而一步一步去經歷佢嗰個階段嘅人生。」
「另一套睇得好開心，有笑有淚嘅係占基利嘅《真人Show》，講一個人喺被創造世界裡面，完全唔知自己嘅世界被創造，好多Cam拍住佢，係人生悲劇，劇本嘅衝突同創意都好強，亦有好強烈嘅諷刺性同戲劇性，占基利當時拋低咗之前一貫嘅演出模式，好值得睇。」
Babyjohn
電影:《真的戀愛了》(Love Actually)
「死前必睇嘅戲一套就夠，因為已經臨死，好多嘢要做唔好剩係睇戲，套戲好開心，因為臨死嘞，感受返愛幾咁溫暖，亦可以從新去擁抱屋企人，係電影最重要嘅信息，第二係捉緊眼前可以做到嘅嘢，盡做。」
林嘉欣
電影:《首演之夜》（Opening Night）
「有導演叫John Cassavetes. 6、70年代拍美國獨立電影，所有電影都好值得睇，因為好少資源就拍到一啲當時美國電影見唔到嘅嘢，佢好鍾意哄得鏡頭好埋，睇到演員嘅表情同心理狀態，點樣慢慢轉移，好精彩。佢同太太Gena Rowlands有套作品叫《Opening Night》，講一個做話劇嘅酗酒女演員，一開場好震憾，全程用hand-held 拍攝。女演員好叻，從一個切割位進入角色。」
陳豪
電影:《時光倒流70年》（Somewhere in Time）
「好感動嘅電影，為咗呢部戲去學鋼琴，識彈呢首歌，亦係我咁鍾意呢部戲嘅原因。」
強尼
電影：《尋找快樂的故事》（The Pursuit of Happyness） 及《嚦咕嚦咕新年財》（Fat Choi Spirit）
「咁多電影，死前必睇點只三套，我就會分類，FOR任何人死前都可以睇嘅，差唔多自己最鍾意嘅電影，就係《尋找快樂的故事》，呢件係真人真事，當你喺人生唔同嘅階段，可能係好失意好失落嘅時候，你睇呢個故事，你會覺得，唔係吖，自己唔係咁慘啫，原來有啲人，要攬住個仔瞓公廁，頂住度門，咁都捱得過，之後會有好嘅日子，調返轉，當人順利嘅時候，自己做少少嘢可以幫到人，改變到人哋嘅生命，所以我好鍾意呢套戲，鍾意得好緊要。」
「第二套係《嚦咕嚦咕新年財》，香港人死前必看，好勁嘅經典電影，咩年代睇都係一套好Update嘅電影，冇舊嘅感覺，我好奇怪，如果你係香港人，無理由無睇過，你係咪無朋友無親戚無過過新年，如果唔係無理由無睇過，所以作為香港人，死之前一定要睇 。」
「第三套留白，好希望呢套係自己拍嘅電影，好希望自己死前有機會睇到一套我認為係代表作嘅電影，或者係人哋死前覺得都想睇強尼拍嘅戲，好希望有一套咁嘅戲出現。」
陳俞希
電影:《伊朗式英雄》（A Hero）
「講一個路不拾遺嘅故事，當你覺得做緊好人好事嘅時候，好多人會懷疑你，會質疑你，最後或者為你帶來災難，睇戲好有感覺，人就係咁樣，做啲好嘅事，人哋未必領情，亦會誤解你，你會唔會繼續堅持做個好人？睇完電影，好多反思，自己會唔會做質疑人嘅人。」
黃宗澤
電影:《辣手神探》（Hard Boiled）
「有我兩個偶像，發哥同偉仔，兩大影帝同場已經好好睇，最後打嘅長鏡頭，係好經典嘅鏡頭，一閂門走景轉景，雖然有啲瑕疵，當年只能夠用呢個方法去做，咁經典嘅鏡頭值得大家去睇。」
袁劍偉 （《季前賽》導演）
電影:《智取威士忌》(The Angels' Share)
「臨死揀一部輕鬆少少，有啲溫情有啲感覺嘅戲，英國導演Ken Loach，2012嘅電影，又開心又感動，乜都有，非常好嘅一部戲。」
賈勝楓 (《流水落花》導演)
電影:《奇蹟》（I Wish）、《綠洲曳影》（OASIS）及《愛情萬歲》（Vive l'Amour）
「首先係是枝裕和《奇蹟》，拍小朋友拍到最純真嘅一面，我心目中拍小朋友拍得最好嘅電影，大家都要睇吓。」
「第二套係李滄東嘅《綠洲曳影》，表面上係好難睇，男女主角都有啲唔正常，一個痙攣一個輕度弱智，但拍到兩個之間非常美麗嘅愛情故事。」
「第三套蔡明亮嘅《愛情萬歲》，全套戲得三個人，一間屋發生嘅故事，非常好睇，想用低成本拍一個有趣故事嘅可參考。」
《星島頭條》新網站有更多精彩內容：http://www.stheadline.com/
