4月20日，大致多雲，間中有驟雨及幾陣狂風雷暴，天氣和暖。美股業績期，陸續公布業績，奈何大部份公布業績嘅股份，無論業績好與壞，大部份低開，雖然有部份最終跌幅收窄，但仍以下跌為主。美股表現反覆，道指跌79點；標指變動不大，跌不足1點；納指則微升3點。大摩營收及盈利好過預期，股價照樣低開3%，其後倒升0.67%收市，市場仍然選擇趁低吸納。

至於唔少人關人嘅Tesla，收市後公布業績，純利跌22%符合市場預期，但毛利率則從19.3%急跌至9.7%，明顯係減價以及成本上升所致，股價盤後急跌6%，且看今晚見唔見有買盤趁低吸納。至於產能方面，公司今年目標為200萬部，較去年150萬部增長逾兩成，營收或增長30%，公司舵手Elon Musk指今年戰略係追求銷量而唔係利潤率，即係盈利方面，要睇毛利率會否進一步下跌。值得留意今年下半年將交付Cybertruck，成為公司新收入來源，另外市場很期待平價電動車Model Q，都有機會成為盈利增長動力。

至於港股呢邊，科網股被減持嘅消息持續，自軟銀減持阿里(09988)、南非股東減持騰訊(00700)，京東(09618)被大股東自己隊自己後，噚日輪到快手(01204)嘅CCASS多咗5100萬股，市場自然聯想到係騰訊呢個大股東要出貨。不過騰訊就話唔係佢自己減，而係佢嘅拍檔想減持，親，都唔使分得太仔細，總之快手就係有成50球貨擺咗喺CCASS等沽貨套現。睇返噚日大市成交少得可憐，買賣兩閒。大市仍然係好淡爭持局面，全日喺20300至20600之間上上落落，個別股份自己圍爐落鑊炒，出好消息就引人入場高位接貨，百度(09888)跟TVB(00511)就係最佳例子，呢啲食少多教訓，無謂入場做點心。