十年人事幾番新，九○年亞姐出身的孫譽文（原名：孫名翠），眨眼間已成立自家珠寶品牌十多年，由買貨、設計到銷售都一腳踢，每粒寶石的價值都逃不過她雙眼。
近年她更成功在國際舞台闖出一片天，早前參加了瑞士日內瓦的珠寶展，成為全球廿一間獲邀參展的珠寶商之一；而本月底，她就會飛往美國拉斯維加斯，參加另一大型展覽。搭飛機多過搭車的她，直言做這一行令生活多姿多采，閃爍奪目，「見好多人，就好似每日見唔同顏色嘅珠寶咁。」
靚嘢人人都鍾意，能夠將興趣變成事業，豐富人生色彩，實在幸福。

孫譽文親自買貨和設計每件珠寶，對於它們的價值、顏色和大細都瞭如指掌，令客人信心大增。

吸王室客人

踏入孫譽文位於灣仔的珠寶品牌陳列室，立即被眼前飾櫃內的帕拉伊巴碧璽、海螺珠和海藍寶等珠寶閃爆。畢竟在這行浸沉了十多年，即使沒有街舖，識貨的客人仍會發電郵向她買心頭好，而孫譽文也會帶珠寶去世界各地展出，或者放在拍賣行拍賣。她數數手指，笑言平均一年會參加八個珠寶展，還未計因做唔切而婉拒邀請的數目。
「我嘅客人有美國代理商，仲有中東王室成員、卡塔爾、沙特阿拉伯、阿布扎比、杜拜、日韓等。香港都有好多名人客仔，好似朱太（朱李月華）、周美鳳同楊小娟，連佢哋屋企人都會幫襯我。」
她的珠寶主攻高檔市場，設計大都是一件一件，獨一無二的，有如藝術收藏品，成為品牌的特色。
多熟客捧場，生意自然做得有聲有色，問到歷來最大的交易？她想一想後說：「我有一套一套珠寶賣畀王室成員，而我眼光好好，又有人脈，可以幫客人搵到全世界最好嘅寶石，好似廿幾卡紅寶無燒、喀什米爾藍寶石，呢啲好難搵嘅收藏品，我都搵到，講緊嘅係幾千萬港元。做珠寶生意最緊要眼光同信任，幸運地好多客人都支持我。」