留意返，《關於我和鬼變成家人的那件事》(下稱《鬼家人》有同志元素，但並非同志片，當中仲有飛車、靈異、打鬥、驚悚、搞笑、警匪槍戰、大尺度露肉、親情、奇幻、懸疑及搞笑，係呀打咗兩次搞笑，因為真係好搞笑。利申，入場完全因為許光漢，自劇集《想見你》後(電影版完全唔掂)，相信香港有大量漢堡(Fans暱稱)，散場後明白電影在台灣點解會大收，更已被我納入不看人生白活電影系列。(上映中)撰文:廖思慧
任何性向的愛情都應該尊重及包容
電影講述直男警察許光漢，因為查案蒐證誤執地上紅包，被迫跟同志冤魂林柏宏冥婚，兩人由互相傷害到變成老友記，同志鬼更助直警緝毒追兇，由討厭到傾到兩句再去到好Friend，最後見到冤魂了咗心事可以升天，睇到兩泡眼淚𠺘吓𠺘吓。
因為查案蒐證，許光漢誤執地上紅包而被迫冥婚。
點解執到紅包一定要冥婚?因為唔冥婚會遭遇不幸，你睇許光漢個樣先啦。
呢位就係毛毛(林柏宏飾)，即許光漢嘅冥婚對象。
戲中有唔少許光漢露肉鏡頭，漢堡(許光漢Fans名)應該睇到好滿足。
許光漢刻意操大隻拍此片，呢個呎吋剛好唔好太大隻呀。
話口未完，又有心口仔睇。
兩人由互相睇唔順眼到互相幫助，唔老土仲好好笑。
王淨係許光漢嘅夥伴，經常拍住查案。
蔡振南飾演林孝遠（孝哥），毒梟集團的老大，出鏡唔多但觀眾對佢印象深刻。
馬念先飾演刑偵隊隊長，即許光漢上司，以為佢奸嘅，被導演Fake咗差唔多成套戲，導演好狠。
炎亞綸飾演毛毛嘅前度，衰人嚟嘅，但佢演得好好。
庹宗華飾演毛毛爸爸，睇開佢做綜藝，估唔到做思想古板但好愛個仔嘅老竇，入晒戲。
其實故事好簡單，但編劇好厲害，將一個可以好老土嘅人鬼巴打情故仔寫得好笑又有高低起伏，喜劇節奏非常精準，有笑有淚有鼓掌的確唔容易。片長130分鐘，有一半時間全場一齊大笑，唔知以為Fans包咗場。
《星島頭條》新網站有更多精彩內容：http://www.stheadline.com/
