本身是「愛車之人」的方中信，曾幾何時視賽車比賽為第二生命，連家中收藏了靚車，亦屬於大馬力級數，但自從做了爸爸之後，方中信割愛賣掉所有大馬力電單車，以免發生意外！最近方中信接受周家怡《恨駕女神》訪問，對於外界視他賽車手，他笑言：「梗係唔係啦，玩過下咁啦。」甚至自嘲變成「東莞李察基爾」！
【其他文章】：盤點10位「登六」男星！80年代靚仔打星走樣暴瘦令人憂心 型佬仲有成身肌肉男人味濃
【點擊睇方中信揸車型樣】：
雖然早前有網民在上海捕獲方中信，聲稱瘦到認唔出 「帥哥也老了」，不過今次現身節目，外形一如以往，佬味極濃。聽到周家怡用李察基爾來介紹，方中信自嘲：「以前就東方，依家就東莞呀！」Cool爆的方中信一講到車，隨即變成「開籠雀」，周家怡問他擁有過多少部車時，他笑笑口稱「唔記得」，但不諱言揸得最耐的一部車都只不過三年說：「最耐嘅咪係我老婆，真係冇得換喇。講真，啲兩個位嘅跑車，買嗰陣時就誇啦啦，買咗返嚟蜜月期兩個月就擺咗喺度。講真我都冇乜地方去，冇理由揸嗰啲車去買餸㗎？試過一次，我覺得好唔方便。」
他又稱已經沒有揸法拉利：「已經賣晒，因為學識咗放下呢個兩個字，隨住年紀，思維都會改，不過見到靚車個心仲會囉囉攣，但理智戰勝咗心魔。」言談間周家怡笑稱他說話的聲調「好正」，方中信淡然地說：「呢啲係天生喎，有啲人話我個樣好惡，但其實我對你都冇惡意，只係唔笑啫，唔笑你都要詐我型？唔得架嘛！如果你要鬧我咁樣，就要我爸爸媽媽講，係佢哋生到我嘅樣係咁，唔關我事喎！我唯有講多少少嘢，冚番啲人覺得我好惡嘅觀感喇！」
曾經何時，方中信與周家怡是「跑友」，聽到周家怡話自己有時會素顏揸車去飛鵝山跑步，但常被抄牌，方中信突然「冷面笑匠」上身，提她下次記得化妝：「我見咁多人著晒瑜伽褲去跑步，都係咁啦，唔通又驚醃親大髀呀？都唔係講車嘅節目，我唔知嚟仲乜？畀周家怡跣咗我一鑊添！」
【其他文章】：
50歲黎瑞恩一家顏值超高 18歲兒子外型高大 女兒得媽咪真傳隨時準備入行
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
