洛辛堡今次由助教領軍，相信會打番場士氣波。
白蘭恩上場主場對利尼史特朗，expected goal達2.96，攻勢入肉過對面好多。不過，客隊只係靠簡單嘅反擊同死球戰術，足以令到白蘭恩痛失三分，反映白蘭恩嘅打法好aggressive，亦睇到今屆挪超幾隊異軍突起，令整個聯賽生色唔少。
有人起，自然有人落，兩隊昔日勁旅莫迪同洛辛堡，季初表現認真麻麻。曾經四奪挪超冠軍嘅洛辛堡，今季11戰只有3勝4和4負，教練列卡度（Kjetil Rekdal）亦難逃被炒一劫。艾爾覺得洛辛堡大脫腳，同前綫入球能力有關。
洛辛堡上季15戰入14球嘅丹麥射手坦斯迪（Casper Tengstedt）轉投賓菲加，新加盟嘅箭頭奧斯卡阿加（Oscar Aga）複製唔到坦斯迪嘅入球效率。球隊火力唔強，後防亦唔硬淨，搞到入埋唔夠後面失。目前洛辛堡嘅expected goal只有1.16，仲差過排尾二嘅咸卡，你就知球隊攻力有幾弱。
今次洛辛堡由助教領軍，相信會打番場士氣波。不過，對手薩普斯堡近幾仗入球效率相當高，主隊唔係有好大優勢，推介讓球主客和「+1」客勝。艾爾
-----
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
