民主派47人參與「35+」初選，涉嫌計劃立法會過半無差別否決財案被控，16人否認串謀顛覆國家政權罪。被告彭卓棋今午於西九龍法院坦承初選中為取悅選民而「扮黃」，法官問到民建聯正合其意，何不加入民建聯。彭卓棋直言「因為個選舉氣氛DAB會輸」，又承認當時「雄心壯志，因為2019年嘅社會氣氛造成咗好多未必有好多經驗嘅素人出到來，我承認我係呢一個浪潮嘅得益者」。
《香港國安法》指定法官陳慶偉問道政綱首2點「從一而終的抗爭派」和「重組警隊」是否選舉承諾？彭卓棋指為其團隊賣點。法官陳慶偉追問會否履行，彭卓棋答會盡力爭取，再度追問下指首2點出於當時社會氣氛而加入政綱，其下4點——香港本位經濟、教育自主化、資源發展、地方充權——才是自己真心相信去做的事情，惟提到「所以我選舉策略導致我哋選舉大敗」。法官陳慶偉問到彭卓棋有否考慮連任，彭卓棋指為未知之數，「立法會唔一定係唯一一個將我理念初心實踐嘅地方」。
法官陳慶偉引述其政綱提及「停止依賴價錢高昂質素惡劣的中國東江水」，彭卓棋解釋從經濟角度而言與其用錢購買未經淨化的東江水，不如興建海水化淡廠，更符合成本效益，惟承認用劣質來形容屬選舉語言，爭取選民認同。法官陳仲衡追問何以刻意提及中國？彭卓棋指沒有深究，用中國、內地、大陸也可以。法官李運騰問昨日證供中彭卓棋曾主張把握大灣區機遇，何故參選時取態突改？彭卓棋重申因為初選目標市場「係深黃嘅」，故採納選舉策略，以選舉語言爭取選民認同，以取得足夠選票。
李官追問其實彭卓棋不一定要參與初選，可以直接參與立法會正式選舉，彭卓棋回應指最初並不知道有初選，後來又認為初選乃好機會，「當係一個民調試一試水溫⋯⋯我希望利用初選試下我團隊攞唔攞到支持」，因為初選資源規模均較小。法官陳仲衡質疑其不止「試水溫」，更改變了政治格調，彭卓棋同意，認為當時「如果我重講大灣區，應該直接畀人foul走咗」，彭卓棋更直認李官所指自己為取悅選民而「扮黃」。法官陳慶偉明言民建聯有協調機制，又支持大灣區，正合其意，反問其何不加入民建聯，引來哄堂大笑，彭卓棋認為「因為個選舉氣氛DAB會輸」，又指未必事事盡皆同意建制派。法官陳慶偉再問但彭卓棋完全不同意民主派立場？彭卓棋坦言「我承認當時係雄心壯志，因為2019年嘅社會氣氛造成咗好多未必有好多經驗嘅素人出到來，我承認我係呢一個浪潮嘅得益者，去畀我實踐我所想嘅，所以我喺區議會我係努力建設。」
盧敏儀再問〈墨落無悔〉聲明中用「會運用」或「會積極運用」於其有何分別？彭卓棋直言「冇覺得有咩分別」，而且內容僅「睇過䁽過但唔係好詳細」，看到文首寫上五大訴求等，談及聯署因為團隊認為「唔簽就一定會輸，簽嘅起碼可以頂住，唔使畀人問咁多嘢」，而自己亦同意簽署，以免「畀人夾」，更指「就算我有細睇——我要坦白同法庭講——我都會簽，因為呢份係鬥黃嘅書來」，言畢笑聲四起。然而彭卓棋再指即使簽署聲明也不會無差別否決財案，因為抗疫基金、政綱提及的海水化淡廠等項目均需財政預算案通過，「希望畀到法庭知道當刻我真係冇無差別呢個概念」。
法庭記者：陳子豪
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
《星島申訴王》100集誕生之我最喜愛影片票選，由6月16日至6月30日，玩遊戲贏取總值超過10萬豐富禮品！
立刻點擊投票👉🏻https://tinyurl.com/38dfzwtv
