6月29日，天氣炎熱，部份時間有陽光，間中有幾陣驟雨，稍後局部地區有雷暴。美國國務卿雖曾到訪中國，亦獲習大大接見，以為中美關係從此踏上康莊大道，似乎又係大家諗多咗。美國對中國未有放鬆防備，美國商務部考慮加強對中國AI芯片管制，NVDA及AMD低開影響場氣氛，不過喺蘋果股價再創新高下，扭轉早段美股跌勢，美股低開後回穩。三大指數個別發展，道指跌74點；標指跌1點，4300水平都守得唔錯；納指則倒升36點收市，盤中更曾升逾百點。美股目前仍然喺高位整固，喺VIX仍然偏低情況下，美股暫難見較大調整，只係現水平入場值博率有限，形成好淡拉鋸局面。

鮑爺跟多位央行行長齊齊放鷹，更揚言今年美國至少再加息兩次，歐洲央行更擺明車馬表示7月勢必再加息0.25%，英倫銀行亦因為英國通脹高企，英息暫時能加不能減。不過美國10年債息卻未有因此再度上升，反而喺升抵3.85%後定咗落嚟，與2年期債息息差擴闊至100點子以上。不過美國房屋求再度回升，加上油價回落至70美元已靠穩，美國通脹下半年或傾向橫行，要成功回落至聯儲局2%嘅通脹目標似乎有啲難度。如此一來，今年減息機會似乎無望。

至於中概股繼續日升日跌，走勢難以捉摸，內地經濟復甦不似預期，呢一點之前都有講過，主要係因為內房呢條支持內地經濟過去廿年高增長嘅產業鍊崩潰，過往倍速增長嘅財富效應不再，過往由房地產市場錢搵錢嘅日子不再，加上過度槓桿買房，令民間債務去到頂點，無論企業或民眾，再借貸都只係債冚債，地方政府未能透過賣地得到收入，中央收入亦大減，購買力消耗盡，經濟復甦當然難見。中央增加補貼嘅同時收入減少，地方政府亦無力出資谷經濟，甚至窮到破產。而港股九成企業係內地企業，內地經濟搞唔掂，港股又點會好，呢個亦係港股自1月展開跌浪以嚟，只有波幅，冇升幅。連北水對港股都只係彈出彈入，無心長坐，散戶被割韭菜多次都已學乖，遠離港股，珍惜財富，港股喺成交薄弱下，反彈都不過係挾淡倉，完全缺乏上升動力。